Tulai vok natgual (swine flu) in Zangkong dong hong bat taktak ciangin ki patau tek hiding hi. Khuasung ah muuktuam (mask) bulh tam mahmah hi. Sangnaupang (Tanlang pan tan 10 dong) te zong muuktuam bulhloh phamawh ci uh hi. Adiakdiak in khuapi sung ah muuktuam bulhlo te sang kikahsak lo hi.

Nai 10 Satma Lum In

Zogam khuapi Kawlpi ah tulaitak in zan nai 10 khit ki vakngamlo ci hi. Avakkhate akam phat mahmah leh ultal te'n deihtak in satgawp uh ci hi. Atamzaw gilbem puak uh ci hi. Tulai naupang paltan (child soldier) vai aminthan mahmah tawh patauh huai simtham hi. Nung Zomi Siamsin khat akivuaklup dektak aa kipan in suuk semsem ci uh hi. (Tulai Siamsin akicih nak leh University Student cihna hi. Eipawl bel university kahngeilo te'n akahte peuh thu ih hilh mawkmawk aa hi in)

Naypyitaw Zuanta

UN Secretary General Ban Kimon tawh kimu dingin NLD CEC member 4  Naypyitaw zuanin tuni in  paikhinta uh hi. Ataktak in sapna ngah mi 5 hi aa Chairman Aung Shwe damlo ahih man in mi 4 bek paithei uh hi. Apai mi li teng 1. U Than Tun, 2. U Hla Phe. 3. U Nyunt Wai, leh 4. U Soe Myint te ahi hi. Shan NLD te zong sam uh hi. Tualo athuzawh uh anuntak saklai uh party dang 9 te zong sam uh ci hi.

Zomi 1 leh Ban Kimon

Zomi it mahmah Pu Cin Khan Lian @ Lianpu (Tonzang) inzong zingciang nitak nai 6 leh 7 kikal kimuhna ding in invitation ngah cih muanhuai mahmah mun pan in tu mahmah in kiza hi. Pu Lianpu pen tulaitak Nagis Rehabilitation lam ah nakpi takin asep laitak hi. Nargis gal tuak tading leh Zogam zusa gal dona dingin European Commission in Euro 2.5 millions Pu Lianpu' tungah piakding in khensat khin uh hi. "Athu hiphot ee process saupi omlai" ci hi.

Maithak Muakna

Cikmah aa aomngei nailo maithak muakna Tonzang Khangnote' kipawlna TCYF te'n 21 June 2009 ni in Tonzang khuasung VMBC (Vial Nang Memorial Baptist Church) ah thupi takin nei uh hi. 2009-2010 Academic year laisin ding khuakiim khuapam pan Tonzang BEHS ah hongkah te muakna ci uh hi. Khuakiim khuapaam pan hong kah thak maithak 100 pha ci uh hi.

Zomi Doctor Taktak Khat Khalkha Ah

Hong nusiasa Siapi Gen Za Dal' tapa Tg Pau Suan Lian @ Lianpu in posting hongngah ta aa Zogam khuapi Khalkha (Hakha) Zatopi ah kia hi. Siavuan nasep akipan theita ding hongsuak ahih manin lungdam huai hi. Zangkong panin dingkhia khin hi. Zogam ah Zomi Siavuan Doctor taktak khat hong kibehlap ahih manin lungdam huai hi.

Pu Hau Do Suan Minthang Mahmah

Nungkum July kha 27 pan 30 dong Iran gam aa kibawl Non-Aligned Movement khawmpi ah akah uital palaite' report hong kehkhia (leaked out) ahih manin tulaitak gamsung gampua ah kizeel mahmah hi. Tua palai lak ah Pu Hau Do Suan, Director General, Political Section, Ministry of Foreign Affairs zong kihel hi. Ama' min kawl tading in tuampian deuh ahih manin tulaitak minthang mahmah hi.

Zomi Khat Hong Suakta

May kha 26 ni Insein gilbem mai aa kiman Tg Go Suan Muang (Tuimang)June kha 29 ni in hong suakta ta hi. Tu in inn lam ciahding in akithawi laitak hi. Akimat laitak aa apuak Camera ngahkik nawnlo hi. Zomi adang khat ahi Pu Zozam (Cartonist) ii naupa hong khahsakta uh hiam khah nailo uh hiam ki confirm thei nailo hi. 

EBC Kikhak Leuleu

Zangkong aa Rev Gin Khen Mang @ Sia Khenpi ii makaih EBC (Evangelical Baptist Church) biakinn uital te'n khaksak leuleu cih kiza hi. Bang thu bang la hang aa khaksak uh hiam cih kitheilo hi. Amanlang in hong honsakkikna ding un thu ngetpih tek ni.

2010 Election Malep

Hong nusia sa Rev Hau Lian Kham @ Sia Khambawi' phuh Grace AG pawlpi in tukha ni 5 ni ciangin a tuucing (Pastor) ding uh teel ding uh ci hi. Full membership anei khempeuh in teel ding ci uh hi. Sia Zam Thang, Col Kam Pum(L) ii tapa , leh Sia David Go Lian Suum tuateng thum nominate uh hi. Hih kiteelna ah Khasiangtho in hong makaihsak dingin thungetna ah phawk ciat ni. Grace AG pawlpi pen Zangkong aa om Zomite' makaih pentecostal pawlpi lak ah a upapen ahi hi.