|
||||
| Melbourne Zomi Nam Ni 2012 Report |
|
Pasian hehpihna leh ki thuahpihna hang in, Melbourne ah a khatveina, kum 64 cinna Zomi Nam Ni Feb 20 ni mah in nuamtak in ki bawl thei hi. Hun pen upmawh bangin, ki zang thei lo suak in, ih van zat te lempak loh hang tawh nai 6:00pm a kipan ding pen nai 7:00pm in kipan thei pan hi. A hi zongin kua mah a phun leh a nuak cih bang om lo in, mipi lam pan tel siam mahmah in, a kisam bangbang a munmun ah lutin ih sep ngeingai na hang leh Zomi te ki thutuak takin ih pan khawpna hangin ih Mi Nam Ni a muak thei ih hihi. Mimal kim in minam puante silh kawmin, ki lawm tak in, kizem sa in, ki pai hi.
Sep leh bawl tam in, leh sangkhak zumkhak laitak hi lo mawk a hih ciang in, hun ngah ding haksa mahmah kawmkal ah ih minam ih it leh veina tawh hun awng lo pi mah in, khen khia in ih paikhawm a, Zomi Nam Ni ih muakkhawm pen thupi in, nuam mahmah hi. Melbourne a dingin, a khatveina a hih mah bangin,kilawp thei mahmah a, hunzat ding dan program hong tam pian hi mah ta leh nawngkai na om het lo in, nuamtak in, ih gelsa om bang in ki zo thei hi. Hih program sungah gualnop la, Zogam ngaihla, Zo ngeina lam, ZAA Youth pan Zomi ngeina puante tawh fashion lah na, Drama lah na, Australia a om Zomi Doctor te pahtawina piakna leh hih hun sungin, sumpi donna ki nei a, $520 ki ngah hi. Hih ih ngah sumte sehnih ki suah in sehkhat pen Tedim Khanngno te leh Pa Vum Nangte nasepna ah a hi zong in, a dang sehkhat pen Nung deuh a thong pan hong suakta Zomi Khangno nih te lungdampihna dingin ki khak ding hi. Tua banah Kawlgam pan Pasian thugen a, hong pai Rev Kap Khan Khup leh Rev. Philip Cin Suan Nang te zong hong ki hel thei uh a, hanthotna zong minute 10 tuak hong pia uh a, a mau tungah zong ih lungdam mahmah hi. Kipatna Thungetna Pa Zam Za Cin in hong neihsak a, tawpna lungdamkoh leh Thupha piakna Rev Gin Do Dal in hong neihsak hi. Lia Ciin Khua Lun in, hun makaihna siamtak leh kizen takin hong neihsak hi. ZAA Youth lam pan in, hungelna khempeuh hong makaih uh hi a, a maute hanciamna hangin in ih vai hong lemthei suak hi. A diakdiak in, tu tung ih pawibawlna ah a thupi pen a kigen leh a ki khawngpen in Drama lah na a hihi. Director Somosis leh Pa Zen Mung hi in, Tg. Khualtawng leh Lia Mangnu te makai in, Kawlgam nuntak dan, tuapan gamdang paina Thailand, Malaysia lutdan leh tua gamte a nuntak dan, tuapan Australia gam Melbourne khuapi hong tun dan teng kimtak in hong lak uh hi. Kawlgam a, Gamnuai mi te leh Galkapte kikal ih haksat dan leh tua hangin, ih gamah om thei non lo in, gamdang ah ki tai a, a diakdiakin ih totna a hi Thailand leh Malaysia haksa taka ih lutdan, Malaysia ih tunteh a tamzaw ansai niangtuisai a, nasem in ih gamtat dan lui teng hong lak kik uh a, nuihzak huai si, lah lunglen huai si lah khasiat huai si, ih ngaihsutna tampi hong phasak uh hi. Tua banah, gamthumna , Australia gam Melbourne khuapi hong tungin, Melbourne hong tunteh upmawhsang ei Zomi pawlpi na tam bilbel in, pawlpi tuamtuam te in, ki tuh bawlpian a, a na muakdan, zoldan teng zong hong lak uh a hih manin, a mi khempeuh in diksa leh ki thukim mahmah bilbel hi. Gam thum na pan innlam ah ih Nu leh Pa leh sanggamte, meltheih tanaute, ih hih theih bang in sum khak in panpih dan te leh khat veivei teh ih neihsunsun haksa pi a khola ih khak hang inn lam sum ki cing thei mahmah lo a, ih lungham khak dan a kipan ih nuntak dan teng kimtak in hong lak uh hi. A ki hel mimal khatciat naksiam thei mahmah uh a, Tu tung ih pawibawlna a dingin a thupi pen hong suak hi. Australia gam ah Zomi Siavuan sem mimal thum leh Doctor of Philosophy khat ki om a, hih doctor teng pahtawina (honour award) ki pia hi. Melbourne a om Dr. Judith Go Lun Niang pen a minam te ading a, a kipiakna leh asepna hangin banah a ma hangin mi namdang te nangawn hong theihpih ih ki saktheihpih mahmah a hihna tawh Melbourne Zomi te ai tangin Zo puandum silhsakna ZAA women makai pi nu Nu. Ciin Vung in hong nei hi. Pahtawina piakna pen ZAA President Pa Lian Suan Kham leh Vice President Pa Zen Lian in hong neihsak hi. Hih hun sung mah in, Pa Mang Za Mungin, Dr. Dongno aitang ding pahtawina laksak a, tua kawm in thuhilhna zong hong nei a, a ma tungpan in, Australia gam ah Zomi Siavuan thum bek a hih loh dan leh ih phawk khak loh Dr. Dongno zi leh tate, Dr. Ciin pasal Dr. John te zong om lai a hih dan hong gen a, tua te zong ZAA in advisory board te hong dong le uh cin, hong ki gen ding a, hih bang piang lo ding hi cih hong gen hi.Dr. Cing Hau Ciin ai tangin, Pa Zam Za Cin hong san sak a, Dr. Muan Thang ai tangin, Pa Tun Khan Pau in hong san sak hi. ZAA in advisory board pen ih muan ih suan teng bek thamlo in Upa taltak zaw deuh teng ki hel mah hi a, mailam ah thudot ding leh meeting ah zong hong ki hel zel ding in, ih kizawn hi. A tam theithei ki hel ding leh ih minam a ding in, ih sepkhawp loh ki phamawh hi. Tu laitaka, ZAA a semteng pen pilpen te hi lo a, a kitel teng in a hih theih sun uh tawh hong sem uh hi. Mikhat bek vaihawm zong hilo a, minam kipawlna pen khatbek vaihawm theih zong hi lo hi. Minphatna leh minsiatna pen khat bek tungah ki nga thei zong hilo hi. Khat bek in minam kipawlna phuankhia cihzong a piang thei lo thu a hihi.Mai lam ah sepkhialh bawlkhialh a om loh na ding in tu tung in ih kisapna hong kilang suak a, mai lam ah ih hanciam ding a hih ban ah thanem na hong gen Pa Mang Za Mung tungah zong ih lungdam mahmah hi. Ih ki cin lohna te ki maisak dingin, mawhmai na zong ih ki ngen hi. ZAA President, Pa Peter Lian in Zomi Nam Ni honna leh vaimuak thugenna hong nei a, Vice President Pa Zen Lian in lungdamkoh thugenna hong nei hi. Nu Ciang Za Dim in, Zo khang tangthu sutna hong nei a, Zo suante ih hihna kuama nial theih ding hi lo hi a hi zong in, Chin zong ih va nolkhin leh paih ding hi lo cih hong gen hi. ZAA Secretary Nangkhankhup in, Zomi Nam Ni thu, Pu Chin Sian Thang leh Pu J Thang Lian Pau te genna te siksan hong gen hi. Tu tung Zomi Nam Ni ih bawl theihna dingin hunlem hong pia ih biak Pasian, a kisam sum leh paii hong sik ZAA management committee member te,pawibawl sim a, banner a mawkna leh a hoih mahmah a, hong bawlsak Zodesigns te,vaipuak leh hong kisehna mun ciat zotaka, hong sem khia te, hih ih pawipi ah ih minam puansilha hong pai te leh hong pai mimal khatciat, kamtawh kong pulak khak loh a simtham a, a nasem mahmah pawlkhat tungah lungdam mahmah hi, Zomi Nam Ni ii pianna bulpi a hi kithutuakna, ki lem na leh nopsakna Zomi te tungah hong tung ta hen. Amen. Lim munuamten hih link na mek un. https://picasaweb.google.com/109133979760814065626/MelbourneZomiNamNi2012 lim ki cing zaw munuam ten hih pen na mek un. https://plus.google.com/photos/111104416824980053952/albums/5712197583544910161?authkey=CPi8zIidp6ivPQ Hong pai khempeuh pizza leh a vot tawh ki vak hi. Nangkhankhup Naulak Secretary ZAA 31/8-10 Emma Rd Croydon VIC 3136 
Bookmark
Email this
Hits: 1740 Comments (0)
 Write comment
|
