Zomi u-le-naute

October 24 ni teh ZNC kum 23 ong cingta in mihing hi leh khang khat hi ta hi. Tu-ni dong ong kalsuanpih i biak Topa Pasian min phat ing. Sum-le-pai thagui thatang le thungetna tawh ong panpih khempeuhte lungdamna ong ko ing. Kum 23 sung kalsuanna ah Zomi min le Pasian min daisakna om lo hi ci ung. Minam tawisang zo taktak hiam cihna ngaihsun kha uh hiam? Ko muhna ah US, EU, UK, UNO le gam thupiten Zomi cih minam min ong thei mahmah ta in um ung. Ahi thei zah in I minnam vaipuakte na gengen ung.

Hih kum 23 sungah na lianpi a kisepzawhloh hang, khangno Manglai sin nuamte adingin ZNC min tawh American Center, British Council te ah Scholarship kingahin a kah sa le a kah lai mi 100 kim bang pha ta hi. Pawl khatte gamdang tung khin zo ta uh hi. A hanciamte English a kilawmciang siam uh hi. Tua Zomi sangnaupangte i minam mindaisak kuamah om nailo hi.

1999 kum in ZNC, NLD, SNLD, ALD, MNDF, kipawl in CRPP kiphuankhia in galkap kumpi kilinglawngsak zo mahmah hi. Tua manin zong gam tuamtuam le Kawlgam sung naiganzi kinte in Zomi cih ong tel mahmah uhi. Tua ban ah ZNC kum 22 cinna pawi 2010 kum in Kalay Myo ah kibawl in Panglong nihvei sapkikna kitangko khia hi. Gam sung gam pua Democracy deih khempeuhte in hong thukim pih uhi. ASSK in zong letmat thu in hong thukimpih a a laiteng amah ki-ap hi.Zomi te in Kawlgam bup linglawngsak zo mahmah hi hang.

ZNC pen a semsemte a bek hi kha lo in Zomi it ing a ci khempeuhte adding hi. ZNC ngimnate ko khangin tangtun’ zo nailo kha ding hi mah ta leh khangnote in ong zop ding uh thupi hi. Ko a semsemte kicinna om zolo hi tasemah leh a mi hong en kei un la, policy na en un. Kei mimal hamphatna zong hi leng lampi tampi om hi. Ahih hang sawt kimanglo ding a, I minam te ading in khang sawtpi zat theih ding ci in ZNC mah apom tentan hi ing.

Kawlgam kumpi dawi tawh kau tawh thagum hat suan tawh, a suangte khut nuai ah hamsatna tampi om hi. Kei bang nuntakna hamsat kawmkal in mat le hen thuak in innkuanpih na ngawn in hong nusia hi. Sih theihnading ciang natna hangtawh zato thumvei bang lum ing. Ahih hang ka sih theih nailohna pen Pasian in i minam ading hong deihna khat om lai ahi tam ci in ngaihsun ing. Gimna tawlna te pen thuak ding cih theih sa a ka sep ahih manin ka lungkim mahmah veve hi. Pasian in zong minam ading nasep pen ama nasem khat mah in hong ngaihsun dingin lamen ing.

Leitung thu, Vantung thu khempeuh Pasian theihloh a piang khatzong omlo ahih manin i minam thu nasepna ah Pasian deihna tawh kizui in Pasian bulphuh a sep ding ka deihna bulpi hi. I minam min zong Pasian’ nasemte phuah hi-a, Pasian tungah Honpa Jesuh min tawh a kip tawntung dinga ki-ap min ahih manin sepna khempeuh daupai hi cih thu ong ko ing.

Pu Chin Sian Thang

President

ZNC

http://groups.yahoo.com/group/zomi/message/60031

Comments (0)

Name

Comment

smaller | bigger

Write the displayed characters

Add Comment