|
 A khat veina Siamsin makaite khawmpi pen abeisa May 28-29, 2010 ni in Mandalay khua, Happy Family huang sung ah picingtak in kibawl khin zo hi cih thu kiza hi. Kawlpi, Monywa, Mandalay, Yangon te pan Siamsin makai 19 kihel thei hi. Meeting pan in “Zomi Siamsin Kipawlna – Myanmar” I thukhunpi kipsakna le mailam kalsuan nading thu tuamtuam te kikum thei uh hi cih thu kiza hi. A khatveina Siamsin Makaite Khawmpi pen abeisa November, 2009 in Tedim khuapi ah kibawl Siamsin Seminar III pan thukhentatna tawh kibawl ahi hi.
English - Zomi Electronic Dictionary kibawl ding
Cope Topa hongbawl sak Zolai kum 100 cin muakna in Zomi Siamsin Kipawlna - Myanmar pan in English - Zomi Electronic Dictionary bawl ding uh hi cih thu abeisa May 28-29, 2010 ni in Mandalay ah kibawl The First Siamsin Summit Thukhentatna pan kiza hi.
E-Dictionary ah English to Zomi, Zomi to English, English to Myanmar, Myanmar to English le adang function tuamtuam kihel ding hi. Kawlgam sung ah om Era Technology Com., ltd. te tawh mapang khawm in kibawl ding ahi hi.
Myanmar gam ah English - Myanmar Electornic Dictionary akibawl zawh khit kum 5 aphak khit ciang in, Zomi te in zong abawl zo ding hong hi ta hi.
Zolai Subtitle in Hollywood Movie
Cope Topa Kum 100 cin muakna in, Zomi Siamsin Kipawlna - Myanmar pan a sawt lo in Hollywood movies te ah Zolai subtitle ki guang ding hi cih thu The First Siamsin Summit pan thukiza hi.
Zomi Siamsin Kipawln - Mandalay pan Siamsinte vaihawmna tawh kibawl ding hi a, "Subtitle guanding hoih i sak Hollywood moive te ngaihsutna kipia thei hi" ci in Mandalay siamsin te kiang pan thu kiza hi.
The First Siamsin Summit pen 2009 November in Tedim ah kibawl Siamsin Seminar III pan thukhentatna tawh May 28-20, 2010 ni in Happy Family Training Centre, Mandalay ah kibawl ahi hi.
 |
