|
Zomi-te ih omomna-ah mite tawh liangko kikim aa ma pan'na tuamtuam ih neihzawh ding kisam hang; Ki piakkhiatna kisam hang; Thuak khopna kisam hang; Lungdam khopna kisam hang; Sepkhopna kisam hang, khatguak sang Team thupi zaw hi!
"I am a member of a team, and I rely on the team, I defer to it and sacrifice for it, because the team, not the individual, is the ultimate champion." Nu Mia Hamm (USA Soccer player)
Minam Leh Tukpeng
Gam tuamtuam tawh teh nangin, tulaitak, Malaysia gamah Zomi khangno tampen dingin ki um hi. Tua sung pan, tukpeng kimawl a kiva mahmah bek thamlo-in, ih gamsung ciangciang ah, mite theihkhop ding ciang aa kivakna a nei tampi ki om hi. A kivakna tawh ih minam hong tawisang ngei zong tampi ki tungkhin hi.
Minam khat, ahih kei leh gam khat peuhpeuhah, Tukpeng kidemna ahih kei leh Tukpeng Team neilo gam/minam omlo kha ding hi.
A Khat Veina
Malaysia gam sungah Zomi-te a omlai siah, Zomi Nam Ni Phawkna/Muakna-in a kibawl den ding ZOMI CUP Tukpeng Kidemna February 14-15, 2010 sungin ki pankhia thei hi.
Sepkhopna, thuakkhopna, gualzawh khopna, guallelh khopna, ki pumkhatna, ki meltheihna, ki lawmtatna, angtan' khopna thu tampi ki mukhia thei hi. Gualzawhna lianpi khat a ki ngah ci le'ng khialh omlo ding hi.
"Success is no accident. It is hard work, perseverance, learning, studying, sacrifice and most of all, love of what you are doing or learning to do." Pa Pele (Brazil Soccer player)
Group Stage
A masa pen ZOMI CUP ah, Team (8) kihel thei aa, Committee vaihawmna tawh, me sawk ciatciatin, Group (2) in ki khen masa hi. Group (A): Tung Zang, Tui Mui, Tui Khiang, Thang San. Group (B): Laaitui, Gua Sing, ZCF-Canaan, ZCF-Bukit Tinggi.
Group Stage kimawl khitteh, Group (A) pan, Tung Zang point tampen leh Tui Khiang a nihna tawh Semi Final kahthei uh hi. Group (B) pan, Laaitui point tampen leh ZCF-Canaan a nihna tawh Semi Final kahthei uh hi.
Champion
Semi Final ah, Laaitui in Tui Khiang te zo aa, ZCF-Canaan in Tung Zang te zo-in, a thumna pen Tung Zang in ngah hi. Final tak ciangin ZCF-Canaan in Laaitui te zo uh aa, ZOMI CUP 2010 Champion pen ZCF-Canaan in ngah hi.
Pahtawina
Final zawhkhit ciangin, Top Scorer, Best Striker, Best Midfielder, Best Defender, Golden Glove, Best Player of Zomi Cup 2010 te pahtawina kinei masa hi. Tuazawh ciangin, Most Fair-Played Tui Mui - Ball khat, 3rd Runner-up Tui Khiang - Ball khat, 2nd Runner-up Tung Zang leh 1st Runner-up Laaitui player khempeuh Medal tawh pahtawina kinei hi. Tua nungah, ZOMI CUP 2010 Champion a ngah ZCF-Canaan player khempeuh Medal khatta leh Cup pi piakna ki neithei hi.
Medal te ciang tawh pahtawina hilo-in, February 20, 2010 Zomi Nam Ni pawipi ciang, A Thumna Tung Zang RM300, A Nihna Laaitui RM600 leh Champion ZCF-Canaan RM1000 tawh mipi mai-ah pahtawina kipia ding hi.
Photos
ZOMI CUP 2010 photo pawlkhat (100 val) anuai aa link pan ki enthei hi;
http://picasaweb.google.com/forzomi/ZOMICUP2010Malaysia#
Fund
Hih ZOMI CUP 2010 nuamtak leh picing takin a kizawh theihna dingin sum leh pai tampi kisam aa, Team khat pan RM500 ta a kidong hi aa, Committee in a zeekna khempeuh vaihawm hi. Veina tawh mimal ma pan'na a nei zong pawlkhat om aa, ki lungdam mahmah hi.
Kum Thum Kizom
Kum simin a kinei ding ZOMI CUP aa cup pi pen, champion ngah peuhin a kumkik ZOMI CUP kipat ding ciang Committee tung apkik ding aa, kum thum kizom champion a ngahte-in tangsuak thei bek hi.
Professional Level Zomi-te
Zomi-te tukpeng kimawlna-ah zong kiva thei mahmah cih ki mukhia thei ahih manin, mikim ki lungdam tek hi. Semi Final panin, Kuala Lumpur aa licence ngahsa professional Refree te kicial ngiat hi aa, "Kua minam na hi uh hiam? Na player te uh professional lutsak lo maw" cih dotna pen hong dong phapha uh hi! Angtang mahmah hang!
Zomi Football Team (Malaysia)
A muanhuai mahmah Zomi Football Team khat ki neita hi. A sawtlo-in, UNHCR Team, Kawlgam pan aa team tuamtuamte ahi zongin, gam tuamtuam aa om Zomi team khat peuhpeuh tawh fellowship neihzawh na ding ki vaihawm laitak hi.
Lungdamkohna
ZOMI CUP 2010 picing takin ih zawhtheihna ding, a phual ngiatah pai aa tha hong pia Zomi National Day committee tung leh thu ngetna tawh ma hong pangte tung lungdam mahmah hang. Nisa, guahzu cilo-in, a kisapna bangbang ah tangzang takin ma hong pang ZEC sang naupangte leh ZAM palaite tung zong ki lungdam mahmah hi.
ZOMI CUP 2010 Committee
Pa Lang Kap Pau
Tg. Thawng Sian Kham
http://picasaweb.google.com/forzomi/ZOMICUP2010Malaysia#
Source: http://groups.yahoo.com/group/zomi/message/47385
 |
