|
Zomi leh Zogam ading veina tak tawh nasepnate Topa’n khat khit khat aban banin a phi/results hong musak ahih manin lawhcinna hong pia Pasian’ min I phat masa hi. Zogam khantoh nading motor lampi tawhna ah, Jan.23,2009 ni a kipanin Khampat-Cikha lampi tawh kipan ta uh a, 27 ni-in tungsiah makaipite’ sawlna tawh Zogam lambupa, H.Vum Nang sawl uh a, lampi tawhna ciang dong taangmi thumte in lungkimhuaitakin va en thei uh a, lampi thak tungah Rev.kiciantak khat I makaihna tawh Topa’ tungah lungdam kohna leh maban saupite apna zong vanei thei uh hi.
Khampat No.1 veeng panin thuneipipa’ thukimna om bangin kiziiksak a, tai thum nading ciang bang zo ta uh in, nasep matelh tuak mahmah uh hi. (Lampi pen zang sungpanin akah tohna pawlkhat pen mualdung teng zuisak uh a, to mahmah kici hi, mailam ah a hoih zaw ding a gel theih uh a, a sepbeh uh leh zong ei a mipite hong buaisak lo-in amau tavuan neite sep ding mah ahih manin I phun ngam pha kei ding hi, ci-in khuami pawlkhatte genna om hi). Balbil khuate bangin a khua uh motor lampi a tun ding cih pen a sunmangun zong a matngam loh kawmkal uh ah, motor cycle beek tung sak zo leng ci-in, khuazang hanciamna tawh a kipat uh tai 2/3 khawng tun khin uh hih tuak hi. Tua hi a, akuamapeuh lungdam thei mahmah uh hi.
Mailam ah Zogam sung kikawmna lampi te hong nop ding a, mei tun nailohna te ah mei hong taangin, tui ngahin teenna dinga nopci muh leh gam hong hih nading Topa tungah thungenin panpih ciat ni. Ih innsung leh pawlpi sung, meltheih unau sung ciang a I zatna pen a hi ding mah hi a, minam leh gam huam a I nasepna pen mipite phattuam nading ahih banah Pasian’ ading a mapanna zong ahih manin thasan to ni, cih I kizawn pha nuam lai hi. 
 |
