|
Zonet' Pu te in, "Ma pangkhawm ni" ci aa tukum 2010 thu bulphuh ding ong pulaak uh Zomite tawh akituak mahmah, Zomite sung aa akisam mahmah thu ahihi. Zonet Pu te'n hih nong pulaak khiat uh, thu bulphuh aa nong neihtheih uh lungkim huai kasa mahmahhi. Ma pangkhawm cihciangin ei Zomite ading ih mitkha ah bulh baih mahmah in ihsep ziading kician mahmahhi. Nisim ih lokuanna aa ma pankhop zia, ihmitkha ah ihbulhteh telnop mahmahhi.
Tupna, ngimna kibangte bek ma pangkhawm thei hi. Zomi leh Zogam, ading aa deihsak, akipia ngam te bek ma pangkhawm thei ding hang aa, Kawl tawh , vaai tawh, Chin cihtawh ma pangkhawm theilo ahihlohhang tupna ki banglo ding ahihman in pan khoploh mah ong suak hipahhi. Tua ihcihciang ma pangkhawmlo dending cihna hilo in, tupna, ngimna akibat na mun ah ma pan khop ding hipan dinghi.
Sing tom khat leh lo giit khat ma pangkhawm cihbang omtheilo hi. Sumbuuk zuak khat leh, kumpi nasem khat ma pangkhawm cihbang om theilo hi.Tupna, ngimna tuamtuak ahihman ahihi. Tua mahbangin khaici tuh khat leh anla khat ma pangkhawm cihbang om ngeilohi. Anlaak hun leh khai tuh hun kibanglohi. Tua ahihman in ma pangkhawm cihciang sepnop kibang ding, sep kibang ding, tupna kibangding, ngimna kibangding aa ahun mahmah zong akibat ong kuldinghi.
Zogam ah lo akikin ciang tha kicial, ahihkei leh kilawm in ma kipang khawm theihi.
Lo khawh, nasep, lo zawh ding cih ngimna kibang ahihman in ma apangkhawm thei ihihi.
Ma ihpan khop leh ihkithutuahloh pahmawh. Lo tuam tuak ah ma pangkhawm cihbang omngeilo hi. Lo khat sung ah ma kipangkhawm thei bekhi. Tua nangawn khat in lokhung lam ah, khat in lo taw lam ah ma pang cihbang om ngeilohi.
Mapang khawm cih ciang in mai tang kikim, maban kikim aa sem khawm cihna ahihi.
Ma pankhopna ah angsung, aituam lungsim om theilo. Khat in ama panna maban azawh kei leh khat in huh ding cihna zong ahihi. Ma pangkhawm cihciang kihuh kawikawi ding cihna hi-in ei ma ah tangtak aa ihkiim ihpaam ngaihsun nawnlo aa paisuak, ei hat ngawn hang ci aa ih mapanpihte nusia cihbang zong om theilo hi. No ong nung delh unla kei hat zaw kahihteh na masa ning cihbang om theilohi. Ahatlo, a ma azolo, ama tut zolote huh aa ma tutpih ding cihna zong ahihi.
Tua ahihman in mapang khawm cihna ah, angsung lungsim pua cihbang om theilohi. Khat guak in a ma zo masa in alawmte'n zo nailo cihbang om ngeilohi. Ma pangkhawm cihna ah khatguak nasep hilo ahihman in mindeihna cih zong kihello pahhi. Akipangkhawm ahihna tungtawn in khatguak thuneihna zong kizang theilohi. Hih angsung, aituam thute hang in Zomite maban tampi matut zolo in buisum pahpahhi. Ma pankhawm theite hina pi hang a
Mapankhopna ah na ma naneusak tuam leh kua man ma panpihding ong deihlo dinghi. Tua ahihman in ma pankhop ciang ih lamwte ma kihuh masa in eima ki nunun hi. Ih gei aa ma panpih te'n zong ama' ma na nunun in ei ma na masak hi. Cihnopna in ma pangkhawm ihcihteh, midangte ading masak, ei ading nunun cihna ahihi.
Ma pangkhawm ding cih na in innkuan khat hiding cih sese na hituanlo hi. Ma ihpan khop khit ciang ih innciat aa kiciah kik hilelhi. Innkuan khat ding cihna ahihloh hang akithutuaklo, akisia, akigalbawl nih in ma pangkhawm cihbang om ngeilo hi. Ma pankhopna ah, ama zolote hehpihna, huhnopna lungsim, nasep zawhding deihsakna lungtang, ih mapanpihte tawh ma tutkhop ding, mualsuak khawm ding, kipawl khopna itna te neihloh phamawhhi. Vangik kipuakpih ding cihna ahihi.
Ma pangkhawm cihna in khatguak ma bek pangkhawm ding cihna na hilo leuleu hi. Khat aa ihzawh khit, ma ihtutpih khit ciang adang khat ma panpih leuleu ding kisam hi. Tua ban ah, lo ciing khat ma khat aa zoding cihna zong hilohi. Ma khat tut khitteh khawl pahding cihna hilo in ma dang khat ataw pan mah in kipat kik ding kullai hi. Huaiham lua in ma gol lua leh maban kimu theilo ahihman in thadah huai dinghi.
Mapangkhawm kim lai khawl cihbang zong omtheilohi. Mangpang khawm kimlai ei thu in mawk khawl ngiau lehang eima kisem lo ding ahihman in avek aa seploh mahtawh ong kibang ding hi. Ma ihpan khop naak leh, gal cihbang om nawnlo in pawl vive hipahhi. Ma pangkhawm cih nungsang, kithutuaklo cihbang zong om manlohi.
Tua ahihman in Zonet' Pu te in, "Ma pangkhawm ni" ci aa tukum thubulphuh ding ong pulaak uh Zomite tawh akituak mahmah, Zomite sung aa akisam mahmah thu ahihi.
Zomite'n ih lokhawh sing puakna ah ma pang khawm mahmah napi hangin adangte ah ma ih pankhop theihloh pen ihihna atung nailo ihihi. Lokhawh singpuak, abulpi ah mapangkhawm theikhin kimlai, kalkhat ihsuan beh takteh pangkhawm theilo cihbang omlo dinghi. Minam vai ih nasep, ih mabante Zogam lokhawh, singpuak nasep dan in ngaihsun kik lehang mapankhop nading lampi ahamsa hetlo ahihlam muthei pah ding hihang.
Ma pangkhawm dihni, Zomi u leh nau.
"Zonet' Pu tetung hibang nong pulak khiat uh zahtaakna kong piahi.
Sakmi, khangmi, nisuah, nitum omlo, Ma pangkhawm ding hihang."
--
Hang Khan Lian
11 Mattar Road
Singapore 387720
 |
