|
Zomi leh Zogam ling niahniah ta. Revolution-WOTY2009
By Andrew Khai
DEC16,2009.
Leitung-ah a piancil pan kipan Power leh privilege ii Humcip Zogam leh Zomi a bawl pan' nung heisan tuanlo ahih man-in, Hunkhat lai-a ih lamet zawhloh thulamdang leh nalamdang tampi nisim-in ih mu toto ta hi.
Hunkhat lai-a a pilpen leh a haupen tebek ii tunzawhna USA,Canada, Aussie, Japan, EU leh gamlian tuamtuam ah Zomite, banghang hiam ih theihloh hang, neihman leh theihman hilo-in a ut zahzah nisim phial-in ih tungta hi. Tote lah ih ci-a Mangkangte lah ih cih, batzawh ding-a ih tuat vetloh, te hazat zawhzah dong-a khangto Zomi honkhat zong ih mu theita hi. Education bangmah a neilo dinmun-a om Zogam ah Zomi Doctorte a thuap a thuap in Medical trip paitawh Seminar paitawh ki lehsuk ki lehtote thu ih zata hi. Ih lamet ngamloh Mang Inn ih cihbek Thaih Inn lianpipi te Zogam ah a dawl a dawl-in a ki thuap a ki tungte zong, tunai Zogam lam a paikha ten, ih muding hi.
Tuamah tawh kibang in ZONET WOTY-2009 kitel na khawng ah ih theih ngeiloh thupi ih sak khaklohte khawng hong ki nominated ciang-in lamdang asa phial zahdong in ih omta hi. Lamdang mah hi Berlin Kulhpi a cimsak khut in Zomi leh Zogam hong lawngta hi. Africante sila-a a ki khawina mun-ah African suante kumpi a semsak Pa khutsiangtho in hong lawngta ahih man-in Zogam leh Zomi kilok in ling niahniah ta hi. Tua pen Mangten Revolution or revitalization a cihcih uh hi-a a khangto ding Minam peuhmah in tuahloh phamawh a ki pelhtheilo movement khat a hihi. A khangtosa leh a suaktasa gam a hi USA te bang in a suahtakna uh pen a tawmpen kum sawm ah khat vei revitalize loh phamawh hi ci-in, Khangkhat khit khang khat American ihcih in banghiam cih ih define tohtoh ding kisam hi ci lailai uh hi.
Naupangno ten a muh ngeinai lohuh ganhing a hi zong, Machine khat peuhpeuh ahi zong munuam mahmah uh hi. Ahi zong a nu leh a pan' a khut tawh lenin a kiangah ompih kei leh, a muhnopna sang a launa lianzaw ahih manin, lauin kap uh hi. Tuhun sung-in zong Zomi ten na lamdang tampi nikhat khit nikhat ih mu toto ding-a eite khuttawh honglen tawntung ih Topa ih phawk keilet Naupang lau-a a kap bang-in lungkham-in ih om theiding hi. Lauding lungkham ding hilo in Lametna leh Lungmuan-na tawh pilvang tak-a etcik ding a hihi.
ZONET pan hong kipan ahi Revolution-WOTY2009 in bangciang mainawt dinghiam cih ei mipi khatciat tungah kinga hi. Zomite ih lungsim hong hencip ahi ka behte ahih kei leh ka lang, ka khuapih ahih kei leh lehbawl ding, ka pawlpi pih a hih kei leh thusim loding cihte bangzah ihpai khia zohiam cihin thu hongkhen ding ahihi. Ih hamsiat vanglak leh tu-a nominate ih bawlna ciangtawh hongkhawl lelding hi. Ih hamphat mahmah leh bel Zomite ih lungsim, ih pumpi leh ih kha tawldamna hun khat ciangdong hongtunpih zoding makai kician khat ih ngahlawh nangzong hithei ding hi. Zomi ih hihna suakta tak-a ih ki sialhtheih leh ih cerebrate theih hun, ih pride khat hong ki nawngkaisak nawnloh hun pen ih lungsim tawldam hun in ka tuat hi. Zogam ah ih deih bawlthei, sinthei, zongthei, zangthei leh nasep silbawl, nek leh dawn lungleng lo-a ih om hun pen pumpi tawldam hun in ka tuat leuleu hi. Zogam-ah ih Pasian suakta tak leh lungmuang tak-in biathei leh gal leh sa lungkham lo aa ih om theih hun pen ih kha tawldam hun in ka tuat hi.
Kei leh hih lai simteng bek hilo Zomi khempeuh a tawm leh a tam Power leh privilege ii humcip sa ih hihi. Humcipna sungpan a suakta nuam vive ih hihi. Tua bangteng tawh pawlkhat-te laigelhte pen pawlkhat te muhna ah poisonous-pen bang-in a mukha zong ommai mahding theihsa hi. Ahi zong mihingte a hoih nuamlo kua mah omlo napi-a ih hoih theihlohna a hang ih phawk theihding ki sam hi. Ih deih suahtakna pen suahtakna bekmah tawh ki lathei hi. Tua hih ciang-in ih mite lak-ah bangbang ih mu aa ih tuak zongin muanlahna leh neuetna tawh humcip lam zanglo-in, Eite a twantung-a hong len vanglian khut muanna leh a hoihpen ding lam-etna tawh midangte eimah bang-in mu-in zahtak zawh sawmleng ih Zogam leh ih Zomi hong bawlpa deih bang in ih suakta ding a hihi.
A simkha mimal khatciat tungah lungsim suahtakna, pumpi suahtakna leh kha suahtakna thupha hong tunkim ciat tahen! Amen. Lungdam.
http://groups.yahoo.com/group/zomi
 |
