|
 By Thangboi
May 26, 2009 ni in, Zomi National Congress Chairman Pu Chin Sian Thang leh Zomi makai mi 4 te in, Insein jail a om Daw Aung San Suu Kyi kiang ahva hawh in va uap theih uh cih thu ZoNet pan in kiza hi. Zomi makai 10 val hawh ding a ki vaihawm hi in, a hun ciang in, haksatna tuamtuam tawh, kipai kim thei lo hi.
Pu Chin Sian Thang tawh Insein a, Pi Aung San Suu Kyi kiang a va uap ding a pai Tg. Thangboi in a nuai a bang in gen hi.
"Zingsang nai 9:30 in Pu CS Thang' inn pan kading khia uh hi. Lampi kikhak kawikawi ahih manin sawtpi lutna ding kazong phot uh hi. Mun khat panin mawtaw tawh kipai thei nawnlo ahih manin siksakol peithum te kawmin kapai uh hi. Insein jail mai ka tun uh ciang in, NLD makai U Win Tin in hong dawnphei pah in ih Pu Cin Sian Thang tawh tukhawm in kiho uhi. Nai 1 khawng tutkhit ciangin U Win Tin in NLD Head Quaters ah ong khol pih leuleu hi."
U Win Tin thu gen pawlkhat : "Pawl khatin galkap sung kitap ding hahgen mahmah uh in kenbel kitam in um keng.Daw Su mahmah inzong ahan ciam pen piangzo kei veh aw. Thanshwe si leh bel thukhat. Dialogue khawng bel ih gengen hang hih te'n election masiah politics sem nawn kei un teh. Election man leh bel deihtak hong kipei un um ing".
Zomi makai te hibang a hangsan tak in, NLD makai te leh Pi Aung San Suu Kyi kiang va hawh uh in, va uap thei uh hi. Ahi zong in, Pi Aung San Suu Kyi tawh ki muh kha lo uh hi. Yangon a om, diplomat tawmkhat te bek muthei ding phalna Kawlgam kumpi in pia a, midang kuamah tawh kimu saklo hi. Aung San Suu Kyi a hi leh, kawlgam kumpi in house arrest a koih hi in May 16, 2009 a , John W. Yettaw, American te khat a inn ah valut sim a hih man in, Kawl galkap kumpi in thubuai a zon laitak a hi hi.
Kawlgam ah democracy ngah theihna ding in, Pu Chin Sian Thang leh Zomi National Congress makaipi te in sum leh pai hun le ni te kipia in, Kawlgam bup a ding makai in na a sep uh kum 20 bang cing ding hi ta hi.
 |
