ZONET pute leh ZONET simte khempeuh tungah lungdamna leh zahtakna tawh!

Khatvei lawmte khat in, “ZONET zong kum 10 sungah a lutlut hita ei,” hong ci vat a, “Oh, hi maw, lungdam huai si e; leitungbup Zomi te khua khat, munkhat ah om banga hong kihosak, hong kizomsak hiven,” ka ci phei buatbuat hi.

A gel masa te in tuni ding galmuh uh ahih manin lawptak in haksa taleh na pan veve uh hiding hi. Tua hun in tu hun bangin Zomi hizah in noptuampih, phattuampih, kinpih, lawppih, zatpih theilo kha ding hi. Ahi zongin suangmanpha khuk to bangin a sungah na hoih om hi cih thei uh ahih manin lungkialo in sem teitei uh hi ding hi. Mi hizah in i noptuampih uh manpha lua hi. Nopna dahna iki hilh ziauziau uh a, khualzin leh gam tuamtuam lengte in zong inn lam tawh thu ikiza ziauziau uh hi. Bangzahtak in manpha a, bangzah takin lungdamhuai, angtan huai ahi hiam. ZONET omlo hileh a kithei ding tampi kitheilo dinga, a ki it ding tampi ki it khalo ding hi.

Omdan khawldan, zinsuk zintoh dan, gam leh nam kep ding dan, sum leh pai zonzia ding honkhat, pilna siamna zonzia pawlkhat, kim leh pam kepzia a hoihzaw, laigelh laibu bawlzia cihte leh a dang tampi ithei kei ding hi.

Mun leh gam gamla pipi ah a kikhenta Zomi sungah kipahtawina leh kithupibawlna cihte hizah in na omlo kha ding hi. I tenna gam ciat omzia leh khantohziate, biakna paizia leh nek leh dawn zon dan a tuamtuam paizia te, kumpi vaihawmzia leh khuasung vengsung kikepzia cihte hizah in ithei kei ding hi. Sau gen deuh leng - Malaysia ah Zolai sinna sanginn om hi cih kitheilo dinga, USA ah Zomi World Cup cihte om hi cih kitheilo dinga, Australia ah Zomi Khuado kimangkhawm zel hi cih kitheilo dinga, Phillipines pan kumsimin Zomi hon khat in degree a sangpenpen te zong hong zo zel uh hi cihte kizalo, kitheilo ding hi.

I Zolai mahmah zong hizah in kizuun, kipuahlo dinga, Zolai zuunsiam, Zolai gelhsiam leh Zolai atsiam hizah in kibehlaplo ding hi. Zolai tawh leitung thupiang khatpeuh kigelh ziauziau thei cih kitheilo kha dinga, Roman laimal zangin computer ah Zolai olno takin ki at ziauziau thei hi cih zong kitheilo kha mai ding hi. Ut veva man hi masalo a nu leh pa u leh nau sunghta putu kipaisan a kikhen vengvengte thu kizakkikna khat pen ZONET tungtawn mah na hi veve mawk hi. Mun pawlkhat ah bang “Inn lam ah bang thu om hiam cih a dotnop ciangin ‘ZONET ah bang thuthak a om hiam?’” ci uh hi. ZONET simte in inn lam thu thak thei a, innlam thupiang tampi kiza ahih manin inn lam leh gam lama omte kizopna bulpi khat a suak hi. Tua ahih manin Zomi te hong khihkhawm, hong khilkhawm leh thu leh la tawh hong zomkhawm ZONET ahi hi.

Mailam ah hihsangin hong khangto zaw lai dinga, a tamzaw in ngaihsutna hoihte kiza dinga, a tamzaw in thuhoih nono hong kigelh zel dinga, a tamzaw in inn lam leh gamlam kizopna hong manlang semsem ding hi. Kum 10 pha pan bek hi mah leh naupang melmawl banglo khangham bangin ngaihsun a, khangham bangin thu leh la hong hawmkhia ziahziah ahih manin ZONET a manpha mahmah hi.

A tamzaw kumte in hong ngaklai a ZONET a khangto semsem, a manpha semsem ding ahi. ZONET sungah u leh nau a kuamah peuh in a sai, a zuun, a sem a bawl, a gim a tawl te khempeuh lungdampih in, thapia den ni. ZONET pute na vekpi uh tungah lungdam ung ei.

ZONET mainawt zel in khansau hen.

Comments (1)

Peter Khampu said:

... Hello! Zomi u-le-nau akuamapeuh; Doctor Cinpu in thu kicing takin hongen teh i muhna hong behlap ahih manin lungdam hang. Zonet pen nasep hoih leh Zomite khantoh nading, ki-pumkhat nading leh leitung khuahun tawh kizui a khantoh nading cihte ngaihsutna tawh vai hamsa tampi kawmkal ah maikaite'n hong vaihawm khiat ahih mah bangin hong khuasuak toto a hihna ih mukhia thei hi. Tu'n kum 10 a cing hi ta mah a mataw, hih ciang dinmun hong tun Pasian' tungah lungdam hang. Zomi sungah thu ki-zakkim nading leh taangko na i neih nop leh a lo thei lo-in, "ZONET" ah i pulak lohin tuni dinmun ciangciang ah ahi thei pha lo thu-in ka mu hi. Topa'n Zonet khankum sawtin hong siam hen la, minam deihsakna tawh gim-le-tawl sii a nasem, makaite' tungah zong dam sawtna lh daupauna hong pia ta hen, cih thupha kong paih hi. Amen! Peter Khampu @ Dai Suan Kham Kalaymyo, Myanmar.

May 20, 2010

Name

Comment

smaller | bigger

Write the displayed characters

Add Comment