|
2008 Myanmar Constitution tawh kituak a 2010 election ah Chin State a ding parliament seats 39 ki nei hi. Kawl gambup a ding MP bangzah ki telsak ding uh a hi diam? Chin State sung a ding in USDA (Kyint-phuat) ten a deihdeih teng uh a guansa pawl khat om a, tua te kuate hiam cih ih theih ding kilawm hi. Tu tadih in, democracy & federal system a deih 1990 election a meekuang luisa a hi, ZNC, CNLD, NLD cih bang party tuamtuam ten 2010 ah meekuang lui ding maw, lui lo ding cih thu kician tak in kiza nai lo hi.
Tu ciang ciang thu kiza dan hi leh Hakha, Thantlang, Falam leh Tonzang township a candidate ding teng ki thei khinzo hi. Township khat ah MP candidate 4 ta ki la ding ci uhi. A hi zong in, tua thuzak dan a bat leh, Thantlang leh Hakha ah candidate 5 ta ki ding sak ding dan hih tuak hi. Tua pen bang hang ahi diam? 1990 election hun lai sang in MP seat tam piazaw hi. Kumpi ten Hakha - Thantlang lam te kihta zahtak zaw in, a lungkim sak na ding a , MP candidate tam deuh piak sawm uh ahi diam?
A hih kei leh, Mindat, Matupi,Tedim.Falam lam ten, kumpi te 2010 election pen ki awlmawh zo lo in, a ut bangbang suak mai hen ci uh zong hi thei. Election a ki heal nuam ding mi om lo zong hi thei hi. Tua bek thamloh in, Hakha khuapiah Kawl te khat candidate ding cih thu zong kiza hi. Tua pen, Minister of Sports Brig. Gen Thura Aye Myint ding kici hi.
Tedim , Mindat, Matupi, Kanpalet, Paletwa lam ah kua teng candidate? USDA ten kuateng nominate ding cih thu kician in zakna om nai lo hi.Tedim ah pen,Pu Zozam in Independent MP ding in election ah kihel kha thei ding cih thu muanhuai tak in kiza hi. A zenzen in, Hakha ah Kawlte candidate a ong koih takpi ding bang hi leh, ei lam ah ei Zomi te mah ong hi leh mipi in ih hamphat pih na ding omzaw ding hi. Haksatna khat peuh , kumpi tawh kisai vaihawmna khat peuh ih neih nop a om ciang in, ih mipih te mah MP ong hi leh hopihna baihzaw tham ding hi.MP a kitel ding te pen, a mau ut thu tawh MP candidate ding ong ki pan uh hi kici thei hi. Mipi te ih hih leh, ut in ut kei leng vote ong ki khiasak teitei ding - ih deih loh penpen te khawng vote khia ding a ong ki sawl kha lai thei ding din mun hi.
2010 election a hun, ni leh kha te kician tak in ki thei nai lo a hih man in, tuama in thu tampi zong ong ki khel kik thei hi. Zomi National Congress, NLD, Chin League te bang in amau deihdan in
thu kivai hawm ding bang hi leh, 2010 election pen ong lunglut huai mahmah ding hi.
Possible USDA candidates for 2010 Election
Hakha Township
Pu That Mang
Pu Tial Hnin
Pu Hram Ceu
Pu Ngi Kung
Pu Lal Kung?
Falam Township
Pu Ngun Lal
Pu Ca Maung
Salai Ceu
Kaptial (Referendum a kihelsa)
Thantlang Township
Dr.Hmuh Thang
Col.Van Kulh
Pu.Hrang Hlun
Pu Hmung Kio
Pu Ngun Hram
Tonzang Township
Pu Zam Khen Thang
Pu Thang Za Tuan
Pu Lian Khan Suan
Pu Thang Khan Dal
Tedim, Mindat, Matupi, Paletwa, Kanpelet lam ah kua tengteng USDA candidates cih na thei leh, anuai ah, commets section pan ong kikup pih ve maw.
 |
