|
 Kalaymyo pan a ong kipankhia Zomi Football Association (ZOFA) tu in a ki mawlsan lai tak uh hi a, Zomi kipawlna tuamtuam pan in kiheal thei uhi. ZOFA Vice President Pu Vung Za Khup in a genna ah, tutung a kimawlsiam Zomi tangval pawl khat pen, Myannamr National League ah a ki hel teihna ding ki vaihawm sak thei ding ci hi. ZOFA CUP 2009 final ciang in, Oasis Myanmar pan in Pu Do Khan Khup in zong ong en ding hi. ZOFA 2009 tournamant pen, kumdang sang in nopci zaw hi. Mi zong kitam semsem a, tukpeng kipawl te zong a siam mahmah tampi om hi. Siamsin Awging leh ZOFA Vice President kiholimna azom in na sim in.
Siamsin : U Khupboih tukum ZOFA pen kumdang tawh kibanglo nopci deuh si e.
ZOFA : Kum khat khit kumkhat khantohna tampi le kilamdanna tampi om zawhna ding hanciam in aki kalsuan toto himah ei.
Siamsin : Nung a Tahan RC le KBC te kimawl sung thupiang teng Committee in bangcih gel nai vua?
ZOFA : Hih tawh kisai-in pen ZOFA Committee bawl thukhun teng a team tek ah akihawm sa ahi hi. Team pawlkhat te in bawlung suite tung theisak khalo ahitam aw cih ngaihsun ing. Tahan RC No 4 pa pen thukhun 6 na palsat ahimanin a mah pen 2009 ZOFA sung kimawlkha nawnlo ding hi. No 6 pan pen thukhun No 4 na palsat ahimanin red card tawh kibang kimawl hun 2 kikhawlsak hi. Zu kamnam akimawl pen a tatak in a dangtawh kilaih thei nawnlo ding cih thukhun a om hi a, ahizong a dendeuh in No 4 pa red card tawh kihawlkhia khin ahihna tawh kizui-in Committee in hehpihna tawh mi kilaihsak ahi hi. Mimal muhdahna tawh hilo zaw a, kimawlna khat pepeuh ah thukhun omte i zuihsiam theihna ding hizaw hi.
Siamsin : Tukum ZOFA ah a muhnop pen le mipi thapiak angah pen kuate kimawl a hi dia…
ZOFA : Tahan RC Vs KBC hipah mawk in teh. Hih pawi sung mipi zong thapiak dan siamlo dektak cih thu security ten hong zasak hi.
Siamsin : Tukum khua veng tuamtuam pan zong hong kihel thei uh hih tawh kisai na muh zia tawm…
ZOFA : Khua veng tuamtuam pan hong kimawl hangun ZOFA in fund tampi ngah tuam ding cihna omlo zaw in Zomi kimawl siam khatlekhat kimeltheih a, koi mun koi mun i tung zongin ZOFA ka kimawlpihte hi cih tawh khatlekhat
unau i hihna te kilang semsem dingin mukhia ing.
Siamsin : Khua veng tuamtuam pan hong kihel manun Committee in haksatna cih dan a om tuam kha hia…
ZOFA : Haksatna cih bang mah om tuankei. A mautha tek tawh hong pai uh ahih man hi. Committee mintawh tui thawl khat zong piazo kei ung.
Siamsin : Tukum ZOFA ah gam dang mite nangawn in tha hong pia uh ci leng nidang in tuadan a om ngei na…
ZOFA : Kum dang in pen gamdang mite tualpi dongah thapia in hong pai cih om ngei kei. Tukum tak ciang Dr Chin Do Kham le alawmte nih hong pai thei uh ZOFA pen gamdang mi nangawn in hong en hita mah ei. Final ni ciang zong gamdangte thapia in hong pai ding om cih thu za ung. Sia Pau Khai lawmte hih tuak.
Siamsin : 2008 ZOFA le 2009 ZOFA akilamdan deuhna a om hia…
ZOFA : Akilamdan deuhna cih pen ka gen pak theihding om tuan kei. Ahizong tukum takciang a pualampan kimawlsiamte kila thei a, tuamahbangin pawi zong hong muhnop tuam mahmah mawk hi. A zenzen in a pualam pan mila theilo hi leng TBC, Tahan RC, St Mary cih khawng bek team khat in akidingzo ding dan hibek hi. Pawlpi khat ah sihna nopna nangawn ah zong khangno nasem
ding a om nawnlo phial i hih man hi. Pawlpi neu hong kihel zolote sungpan Zomi kimawl siamte kihelthei uh ahimanin i minam ading kilapsanna khat zong hong suak hi.
Siamsin : Mailam ah ZOFA in bang ciang a huamzo tam…
ZOFA : Zomi, Tedim kampau pepeuh kisang ding hi. Tukum zong Cikha pan hong paisawm uh cihthu na za ung. Hong paizo bang hileh lungdamtakin a kisang ding hi.
Siamsin : ZOFA ngimna bulpi tawm khawng nong gen thei dia….
ZOFA : Kawlgam ah bawlung lam khantohna tampi tak hong om tawh kizuiin ZOFA akimawl khangno thu mang velvel te Pasian thutawh hoihtak makaihinkimawlziate sinsak bekthamlohin MNL nangawn ah kimawlna hang nuntakpih lawh ding khangnote
pantahtoh kisawm hi. Final ciang zong Yangon, Oasis Myanmar pan Sia Do Khan Khup hong pai ding a, ZOFA a kimawl khangno asiam le thumang te Yadanarpone FC ah guang ding hing hong ci hi.
Siamsin : ZOFA tawh kisai mipite tung vaikhak nop a om dia…
ZOFA : Omlua…. a diakdiak in thapiakdan i siam ding mahmah hanthawn nuam ing. Tha i piaktak ciang tuan ngawp, sui cip cih khawng i pauloh ding thupi sa ing. Banghanghiam cih leh akimawl teng pen Zomi sungah sanggam vive ihihman hi. Thapiak dan siam Zomite i hih ciat nang kisinpha mahmah ni cih vaikhak nuam ing.
Siamsin : U Khupboih aw pawi en nuam mahmah laitak a hun nong piak lungdam mahmah ung. Topan ZOFA tung gualzawhna tampi hong ngahsak lai tahen.
ZOFA : Kei zong lungdam mahmah ing.
Note : ZOFA Cup pen biakna bulphuh a kibawl ahihbanah, biakna nei Zomi khangnote sungah khatlekhat kimeltheihnading, kilawm-tattheihna ding, ki-it theihna ding deihna ahimanin, tuate tawh kituaklo a kimawlte peuhmah nasiatakin thu hong kikhen ding hi.
( By Siamsin Awging Tanu)
 |
