|
Written by Zam Thuam (Siansin)
Monday, 02 August 2010 04:57 |
 |
 |
 |
|
|
Biakna lam khuahun kikhelna le Zomi sung kipumkhatna |
Zomite in pupa ngeina biakna hunsaupi a kibiak khit ciang Laipian upna ei sungpan hong piang khia hi. Tua khit ciang Tapidaw upna hong tungin Tapidaw acihna sungah Baptist( Tuiphum) le Catholic( RC) te hong hi hi. Upna namkim omta a kici thei Zomi te sungah kilamdangna biakna upna in hong khen hi. Ngeina a zuite upna, tuiphum a zuite upna le Catholic RC upna a zuite upna, hih thum teng in Zomi te sungah hong phungpha pen hi.
Zo ngeina pan Tapidaw upna ah hong kilaihna pen manglang mahmah hi. Bei pah cih ahih loh hang upna kikhelna hong om den hi. Biakna hangin mite hong tuamdangna hong om hi. Upna hangin u le nau behleh phung nusia gam uh hi. Zotual upna pan Zomi te sungah biakna lam upna lut hong kipat pat pan Zomi te kikhelna zia en leng, khatna ah Upna hangin zulesa, tong le lam, ulenau, beh le phung nusiat hun, a nihna ah upna hang pawlpi nusiat hun le a thumna ah Pawlpi hang upna nusiat hun kici thei hi.
Biakna tawh kisai upna tawh sanziate sangin tua hangin hong piang minam sungah kipawlna tawh kisai sanziate hong ngaihsut huai pha mahmah hi.
1. Upna hang Ngeina le Ulenau Nusiat Hun
Upna kician in hangsan uh hi. San zia kibanglo a, a u a nau le a beh a phung nusia gam hi. Zu hawm sa hawmna ah nawngkaina om hi. Mipi sungpan tuam om ahih man mipi kipawl a nasepnate ah upna hangin a nawngkaisakna tawm in minam sung kipawl theihna lim kiam luatna om lo hi. Sangmangte pahtahna hangin minam sungah meivak a vak masate hong hi hi. Tu hun thu-um mite bang hilo in sa gawh zu lup uanglo in lamtak kuasah zanglo ahih man an khing tui buk hong kikhol deuh hi.
2. Upna Hang Pawlpi Nusiat Hun
Khanlawhna thu Zogam ah hong lang ciang, Tapidaw upna pan a thak upna khat hong piang hi. Biakna lam kipawlna pawl khat in khanlawhna thu ci uh hi. Mi masate upna le khanlawhna thu upna kikal ah sanzia tampi kilamdanna hong om hi. A diakdiak in Tapidawte i khuasak gamtatzia ding tawh kisai thute ah ngaihsutzia hong kibanglo hi. Mimasa upna ( Pianglui) nusia in khanlawhna thu upna ( Piangthak) tawh kituak pawlpi te hong ding hi. Pawlpi mi zolna ( Pawlpi mi kituhna) hang hiam, biakna makaite thugen deih kaih khialhna hang hiam, hangin Tapidawte nuntak khuasakzia kikhelna hong om hi. Minam sung kipawlnate hong nawngkaisak pian te hi Mimal a tam zaw in Christian upna zia hong sang thei khin hi. Hih in Catholic upna (RC) sungah kilokna hong omsak zo lo hi.
3. Pawlpi Hang Upna Nusiat Hun
Mimasate upna le khanlawhna thu tawh pawlpi te kikhenkhapna hong dai hi. Pawlpite letkip upnate in Pawlpi mite upna sungah nungta khin nawnlo hi. Biakna pawlpite in upna le khuasak gamtatzia sangin minam le kampaute tungah nasiatak hong kinga zaw uh hi. Biakna lam kipawlna golte minam tawh hong kikhen in Pawlpi tampi tak kampau kilamdanna tawh hong kitam hi. Cik mah hun in kikhen teh i cih pawlpi te zong minam kampau le mun le gam hang hiam in hong inntuan ta mawk uh hi. Biakna pawlpi namkim in tuak kim ciat hi. Pawlpi deidan nawnlo in kituak mawk hi.
Lawng Khat, Kipumkhatna Ding
Minam sung kipum khat na ding in biakna in a hoihpen leptuahna hi nawnlo ding hi. Tuni ciangciang biakna pawlpite in kigawm tuahna lam tam manawh lo hi. A kiphelkhamsa ahihna, minam kampaute in a mang nawnlo ding kigite hong hita hi. A dam zong in a pawn bei nawnlo ding hi. Biakna hangin minam kipumkhat ding cih lametna mipi tung piakna in thuman pen hong hi kha nawnlo thei ding hi.
Minam khat tha hat nading in biakna ah upna khat hihna ahih leh a hoih pen ahi hi. Tua bang hih ding lametna beita hi. Minam hihna ah thahatna dingin a kisam pen in bang hiam cih zontelna ( Solution) thak zon huai zaw hi. Lametna khat a lui hong hi in a muanhuai kei leh kikhelna ( Changing) bawl ding san siam huai hi.
 |
|
Last Updated ( Monday, 02 August 2010 05:05 )
|
