Tukum Malaysia, Kuala Lumpur khuapi laizang aa kibawl Zomi Nam Ni limlaak (photo) a mu kha peuhpeuh in, lungdam huai ei aci ih om hiam? Ahih kei leh, hizah tak lawmlawm khua ngaih huai si hang, aci simsim ih om hiam? Aki banglo muhzia tuamtuam hong pia ding hi; Kum 64 Cin'na Zomi Nam Ni bawlin pawipi a pai kampau kibang sinsen Zomi 3,000 ki pha dek phial ding aa, Stadium Chinwoo acih indoor stadium pi khat a kikawm pen, naupang tutna ding zong awng nawnlo zahin ki dim phitphet hi. Tutna mun awng nawnlo lampi awng teng ah a kidin' ngeingai tak ciangin, pawi kemding aa ih kawm rela te bang khua ul nul liang mahin lampi ding sial keii uh hi. Numei naupang pawlkhat a ciahkik mai ki-om hi. Tua zong pen, tul bangzah pawi hong kihel theilo cihkhat omlai hi!

"Sorry! Tiada kerusi lebih." cihdan pian khat kammal a kizak dong taktak hong tun' teh, vaihawm Committee te lampan cihna ding om nawnlo hi. "Sorry! tutna lakbeh theihding beita!" a cihna hi aa, tutna mundang pan a kikawm theiding zongin a munding omthei nawnlo himai hi.

A baih hetlo mah hi....
Hizah tak aa mipi ih tamna lamkaal lak khat ahi Malaysia ah Zomi Nam Ni pawipi khat vaihawm ding pen baih vetvet lo-in, kikupna bekbek zong tampi vei neihkholh kul, kigin' kholh tohtoh himai hi. Vaihawm khawm zokhin ihih manin tualam saupi ih genkei zaw ding hi.

A 6 Veina Zomi Nam Ni....
Leitung kha sim danin February 20 ni lian mahin, laimal 'Z' tawh a kipan Zomi Nam Ni cih stage nung lam aa banner/ backdrop mai-ah pawipi a kibawl pen, tukum 2012 ah Malaysia aa ding A 6 Veina hita hi. Kum simin mang kam tawh ih gelh ahi phial zongin 'Z' mah tawh kipan den hi. Mailam ah zong 'Z' mah tawh kipan ding hi.

Kum 6 cihpen, naupang bang hileh tei mahmah ta ding cihna hi. Tei bek hilo-in, gamdang aa om a tanaute zong hopih theita hi. A gamdang aa om tanaute-in zong, tua naupang a it takpi leh phawk zelzel ding aa, a veina lian semsem ding hi. Tua a veina pen, huih lak ciangah mangthang saklo ding hi.

Hungeelna bang lianin ki zawhbawl thei....
Committee te vaihawm siamna pen, hungeelna (programme) ah kimu masa gige hi. Tua hungeelna bangin ih zawhtheihna ding pen lasa ding, tumging tumding, thu gen dingte tung ki nga zaw aa, mipi tung kitam ngaklo hi. Nitak nai 6 aa manding geelna pen nai 6 in kiman thei ahih manin, Zomi hizah takin vaihawm khop siamna khat ih lakkhia thei hi.

Hungeelna sa ahi Thukong hon'na hun Zomi Nam Ni Committee Lutangpi ahi Pa Nang Khan Pau pan zawhna lungdam kohna leh thupha piakna hun Rev. Dr. Zam Khan Thang dong, a kipelh leh a nunung ding masak, a masa ding nunun' cihbang omlo-in ki zothei hi.

Tuahkhakna pan theihthak thu....
A masa pen ah, committee te vaihawmna thupi-in, mipi-in azuih kisiam ahih manin pawi nuam hi. Zomi Nam Ni hita kei leh, Zomi te mipi mihon tawh pawi khatpeuh ih vaihawm simin pauban'na, kicin'lahna neng om hamtang thei aa, tutung Zomi Nam Ni pen, a lamdang takin genban'na ding, tuaci lai leh cihtheihna ding tawm mahmah hi. Zomi sung ah, vaihawmna khatpeuh picin' zawhna ding pen, a mipi phazah tung ki nga hikei-in, a madawkte, a palaite, tangmite tung tampi a ki ngak lam ki muthei hi.

Committee thupi....
February kha aa ding anung November kha bangin committee a din'zawh pen thupi hi. 2011 November kha pan a hunhunin ZAM zum ah kikupna kinei toto aa, sepna tawh a kizop ciang pawi nuamtak a kizo thei ahih manin, bangteng vaihawm in, bangteng sem khol le'ng hoih cih a muthei leh a gamtang pah Committee aa kihel khempeuh thupi hi.

Pawi khat etlawm theihna ding mit hong la masa pen....
Bang a'itam? Innpi sung ih lutphei lianin ih muh pahtheih stage nung aa backdrop pi aa kipan, kongpi lutna-ah a kihawm sticker te, tukum Zomi Nam Ni logo leh hungeelna cihte khempeuh international level phialin hun pia aa design hong bawlkhia Tg. Mungpi @ Paukxii (ZomiCorner) ahihi.

Tumging tumsiamte leh lasiamte thupi....
Khatkia lasakna bekbek dawng 21 sungah Malaysia lasiam pa sak dawng 2 hi-in, tualo Zomi lasiamte pen tumging siamte tawh hong kithuah taktak uh ciang, Zomi te sak dawng 19 sinsen, pan khial, set poimawhna khat om tadih, aw tunglo vat, mi kimlo-in kingak cihdan khat mahmah zong ki mulo hi. Zomi te sak khempeuh namdang kam tawh kisa omlo bek thamlo-in, Zomi veina, Zomi maban aa ding kiphuak la vive hong sa uh aa, lungsim hong lawngsak zo mahmah uh hi.

Atung aa ih gen bang lianin anuai aa tengin tangthu hoih khat gelhthei uh ahihi;
ZOMUS te vaihawmna tawh, Lead - Steven (Pau), Bass - Khai Sian, Drum - Biak Tung, Keyboard - Khai Mok, Rhythm - Khual.
Zomi lasiam bek hilo-in a siamna tawh minam veina a lakzo: Kamseen, Suanno, Deih Mang, Khaipi, Nuamboih, Lianpi, JK Zom, Muan Cing, Sian Lun, Cinpi, Ciin Hau, Nuam Cing, Victor, Lamboih.

Kamseen pen, ih gam pekpan ih sap mah bangin, a la neih tampi sungpan hong ten'khiat khempeuh in mipi lawng zo ngiatin, a tawpna lam ah bang, mipi sungpan pahtawi loh theihloh, lungsim phu valval ta ahih manin sum kiphal zahzah stage tung ki piato ziahziah hi. Zomi te aki pahtawi theilua himawk hang. Zomi, zom di'am?

Ngeina laam a lakte kiva....
Ngeina laam ahih kei leh ih ngeina alak laam hong lakkhia anuai aa tengin, pawipi-ah a lahtheih ding ciang uh pen hun tampi, sum tampi mah bei aa asin ciatciat uh ahih manin, etteh huai thei mahmah uh hi. A sinna dan mah un kituak takin lakthei uh ahih manin a kiva mahmah uh ahihi.

ZEC Sang Naupangte, Tungzang Khua pan sanggamte, Tonzang Lawm pan sanggamte, SDA pawlpi pan sanggamte, Rawang khawk pan sanggamte.

Thugennate thupi leh manpha....
Lamsap zong cing takin kipia zolo himah ta leh, hun khat lai-in minam aa ding a sepna gam ah, mipih hizah tha pia ding Australia pan hong kihel thei Pu Zo Khai in hun saupi tak la hetlo na pi, lai simsa ahilo a phukkhaksa leh a muhna tantan zui-in deihtak thu hong genteh mipi ki tha ngah mahmah hi.

Rev. Dr. Cin Sian Pau tung panin zong, Zomi te pen Ngeina kician ih neih lam leh Lai kician ih neihziate tomkim takin hong genkhia thei aa, muhthakna leh Zomi hih angtan'na tampi hong khangsak hi.

Pa Kam Lian Mung in, Zomi Genvai Kipawlkhopna (ZSM) ii nasep zia leh Zomi sung genvai lamah bangci sepkhop huai cih hanthotna hong neithei hi.

Thugenna khatmah ahi, hih Zomi Nam Ni vai aa sumlut leh sum zatna khempeuh, aneng atawng in a ciamtehzo Zomi Nam Ni vaihawm pawl Accountant Sia Kap Lian Thang in pulak khiatna kician sinsen in hong neih khitteh, tukum Zomi Nam Ni pen ei leh ei dingzo himawk hang ei ci-in, angtan'na mitte kimu thei hi.

Thugenna khatmah ahi veve, Zomi Nam Ni vaihawm pawl Thuvanpi Sia Hau Suan Khai tungpan Lungdamkohna kicing khat ki zathei-in, hih pawipi hong pian'theihna ding, sum leh pai, thatang, siamna, ki piakkhiatna, hun piaknate tampi a kisap lam hong phawkthak sak bek thamlo-in, Zomi sungah lungdam kam ih kikoh zawhpen angtan' huaina hong musak hi.

Zinmang pawlkhat hong kihel thei....
UNHCR ulianpipa aa kipan zumke tuamtuam uliante a kisam hi aa, tua sung panin CDU (Community Development Unit) pan uliannu hong kihel thei-in, tha piakna leh a deuhdeuhin, Zomi te na ki pumkhatna-uh khahsuah peuhmah kei un, na ngeina uh mangsak kei un cih tawh tha hong pia thei hi.

IAD lam leh UNHCR-Malaysia mahmah ah Administrative lam leh Siavuanpi asemnu pen hong kihel nuam himah ta leh, hunpi kipat ma deuh ciangbek hun awng ngahthei ahihna tawh, hong vaikhak nop thute CDU uliannu gensawn ding hong kengsak aa, ama tangin a kammalte ki zathei veve hi.

Ki meltheihna tawh a kisam Malaysia gammi laphuak, lasa, studio a nei ngiat, UNHCR in pawi tuamtuam ah azat (Tg.) Ariff Akhir in, nung kum sung aa galtaite haksatna teng a bil aa azak khitteh a gelh la pen hong sa aa, a sakma-in "Dammaw?" ci-in ei kam tawh mipi a hopih ciang, ki tha ngah lua-in innpi ki thawn zuah ta ngial hi. A dawng nihna pen, na vekpi vua ding kong sak hi, ci-in "White Dove" acih kammal hoih mahmah kihel mangla tawh tha hong ngahsak mahmah hi. Tua la asak ma-in ZEC sang naupangte amah tawh a sakhawm dingin samin, mipi tawh zong zaikhawm ziahziah hi.

ZAM pan lungdamlahna mualsuangno, UNHCR uliannu tung Pa Nang Khan Pau in pia aa, Ariff Akhir pen aki meltheih pih Tg. Kham in pia thei hi. Mualsuangno bekmah ki piazo aa, cialna guaihna cihbang ki vaihawm zolo-in, amah'n zong na lamen khollo sam hi.

YouTube 1: http://goo.gl/dmccB
YouTube 2: http://goo.gl/XfmTt

Tongsan Pen pahtawina piakna....
Zomi sungah thuasuah tuamtuam, lai lam nasepna leh thu leh la a lakkhia, a khahkhia zo leh a kician aa nasem zo penpen, mipi teel khatpen Tongsan tanute-in Tongsan Pen Award ci-in pia uh hi. A pia khia Tongsan tanute-in hun saupi la-in, mipi me (vote) khiatna neisak uh hi. 2011 Tongsan Pen Award pen, ZomiDaily (www.zomidaily.com) in me tampen tawh hong ngahthei hi. Tongsan tanute ngetna tawh Zomi Nam Ni hunpi sungah, Joseph Kam Tung Sang in Sia Mangsen tung Pahtawina Laipi piakkhiatna hun etlawm takin kiguang aa, a thu leh a vai omzia teng zong Sia Kam Sang mahin kicing takin pulak masa hi. ZomiDaily tangin Sia Mangsen tungpan lungdamkohna kammalte kicing takin pulak thei hi.

Zomi Cup pahtawina piakna....
Zomi Nam Ni pahtawina-in kumsim aki vaihawm Zomi Cup Tukpeng Kidemna pen tukum zong kizom thei aa, January 23-27 ni (5) sung buppi hunbei hi. Zomi Nam Ni pahtawina aa kihel Khuate, Zomi Nam Ni pawi sungah ki pahtawi ahihi. Hih pahtawina hunsung Tg. Kham leh seppih tengin makaih hi.

A masa-in, Zomi Cup a kumthumna vaihawm ding kipat theihna ding leh kipat ngamna dingin nung kum pan Cup golpi leina ding sumtang hong piakhia USA aa om Pa Langh Kap Pau leh Pa Thang Do Hang (Tungzang Khua) te unau tung Zomi aveina uh lungdam angtan’pihna bei ngeilo aa, ZAM in Mualsuangno khat ki pia hi.

A zomah, Zomi Cup 2012 a kihel Khua (26) te a makai khatta tungah Pawhtawina, A Lina (Darkhai), A Thumna (Anlangh), Mimal kimawl siampen ngahte, A Nihna (Voklaak) leh Zomi Cup 2012 Champion (Gua Sing) cihte a kimawl khempeuh pahtawina picing takin ki vaihawm thei hi.

Video leh limlaak (photo) te limtak kila....
Video pen Laizom Media in minam aa ding sepkhiatna tukum hong zom leuleu hi. Limlaak zong ZAM camera pen Tg. Mungpi (ZomiCorner) in hong letsak aa, ZomiDaily pan Sia Mangsen in zong kim takin, tawl nga manlo-in lathei uhhi. Maikaal sungah DVD hawmkhiat zawhding ki hanciam laitak hi. Tampi sungpan aki tengkhia photo (183) anuai-ah ki enthei hi.

Thungetna....
A patna lam ih gensa, mipi hizah lamkaal (Malaysia leitang) aa ih omlai pen a lungdam huai hikhollo hi! Ahi zongin, hizah tak om gige Zomi Nam Ni cihzong phawk khalo, ahih kei leh ih utna tekah bawl, ahih kei leh tha ngah dandanin bawl cihbang ih omloh pen, Malaysia om Zomi te ki pumkhat aa vaihawm khop zia kihat mahmah cihna hi.

Suahtakna leh mihing hamphatna kim takin a kingah theihna gam tuamtuam aa om mipil makai tuamtuam leh mipite-in hih kum 6 apha naupang tungpan etteh theihding tawmtawm om leh kilawm hi. Zomi te ih vaihawm zia a hoihte tha kipia ni.

Zomi Nam Ni 2013 ciang, Malaysia ah Zomi hizah takin a bawlding ih om nawnlohna ding, gamthumnate-ah tul tampi a tungkhin dingin thuumin thu ih ngen hi.

Tg. Kham & ZomiDaily

Photo link:
http://goo.gl/yhOA5

Comments (0)

Name

Comment

smaller | bigger

Write the displayed characters

Add Comment