Zomite Zo leitang tungah Khristian I suah zawh kum 100 a cing hita hi. Khristian biakna in kum 100 sungin Zomite aniam mah mah mihinzia pan hong khaisang-a, a sangpente tawh hong kikhawlsak thei hi. Zomite I zia I tong, I ngeina, I khuasakziapawlkhat kinusia, pawlkhat kibehlap-in pawl khat kikemcing hi.Tuate sungah Zokam leh Zolai pen Khristian biakna in hong kepsak hong khansuah sakin hong zunsak hi.

Tua a hih manin Zomi Khristian kum 100 mualsuang ah hih thu a ngaihsut taak mah mah ahi hi. Zomi bup kampau thu tangzai mahmah ahih manin"Tedim kam" ci-in neuseek sukin a nuai-a thulute tawh kikum leeng:

1.    Tedim kam khanggui sutna
2.    "Tedim Kam" cih min i ngahna
3.    Tedim kam "Taangkam" a suahna
4.    Tedimkam kantelna
5.    Tedim kam nungta i cingam diam?
6.    Mailam ah i Tedim kam

1. TEDIM KAM KHANGGUI SUTNA
Leitung mihing awn 6,000 valte in kampau nam 6,908 bang nei hi ci-in kiciamteh hi. Kawlgam sungah mihing awn 50 valte in pawunam 135 bang kinei a, Zomite' pau 53 om hi ci-in Kawlgam kumpi in hong ciaptehsak hi. I Zogam neuseksek sawm leeng nam 100 val om dingin ka um hi.
Leitungah hizah a tam kampau tuamtuamte a guigui, a behbehin kikhen dimdiam hi. Kampau lam a siam (Linguist) David Bradley thukanna siksan le'ng i Tedim kam khanggui (Language family) a nuai-a bangin kisut ding hi.

Sino-Tibetan
Tibeto-Burman
North-eastern india Group
Kuki Chin Naga
Kuki Chin
Chin
Northern Chin
Tedim

2. "TEDIM KAM" CIH MIN I NGAHNA
Min thu gen-in pan ni cileng thukhupna a om thei nailo a buaihuai mahmah thu khat ahi hi. Zomite in kum 100 sungin minam minkip neizo nai lo hi hang. "Chin" leh "Zo" peuh kisut kituh lai-in zattaang theih ding kampau nei nailo hi hang. Hi bang bilbial kawmkalah "Zomi" a kici phadiakte in " Tedim Kam" cih min i ngahna thu a nuai-a bang hidingin ka um hi.

Sangmangte hun lai-in "Kamhau Dialect" na ci ngei uh a, Kampau a kan mi masate in "Sukte" ci-in zong na minvawh ngei uh hi. Tua minte in tua hun lai-a ukpite' beh min ahih kei leh ukpipa min ahi hi. Ukpite' thuneih lai-in a mau bangkua sung pau na thupisak mahmahin gambup zat dingin thu na pia hi leh "Teizangkam" kipau ngeingai kha ding hi. Gam uk makai masate thukhualna leh picinna ahi hi.

"Tedim Kam" cih pen midangte hong sapna hi loin ei le ei i kisapna min (egonymn) ahi hi. Pu le pa min khatpeuh a kitap hilo a, a te-dimdim "vansang dim" omna mun a kisat "Tedim" khua kitap (eoconymn) min ahi hi. Tedim khua pen 1550 kumin kisat hi cih tangthu kante' ciaptehna ahi hi. Ahih hangin kilalsan zel kisuan kik zel hi. 1850 a kipan-in tuni dong tatsat loin kiteng a, ei Tedim mite khuapi ahi hi. Tedim khua ah i teng ngeikei phial zongin Tedimmi cih ding a angtanpih ciat i hi hi. Tedim khua ah hunkhat lai-in Teizang, Saizang, Thado, Vaiphei, Guite, leh Zo kampaute in "tual" khat zangin kitengkhawm hi, Tua bang a, pau tuamtuam tenkhopna panin pautuam khat hong pianga a nungciangin "Tedim kam" kici hi. A neituam kuamah om lo hi.


3. TEDIM KAM “TAANGKAM” A SUAHNA
Hun khat lai-in Tedimgam i cih pen tu-in Tedim, Tonzang leh Cikha gamkhen (Myone) suakta hi hang. Tua sunga teng Zomite leh tua gam pan Kawlgam Vaigam a tung Zomite in i taangkam leh (common language) dingin "Tedim kam" zangkhawm theita hi hang.A mual a lui zui-in i awkaih tawmtawm kilamdang-a, ahih hangin kamphen kulloin kihothei hi hang. Tua a zang khawm thei kampau innkuan dungah Sizang, Thado (Kuki), Zo, Dim, Guite, Khuano, Losau, Paite, Phaileng, Saizang, Teizang, Val leh Vangteh paute kihel hi hang, Tedim pau "Taangkam" a suah theihna thu kampau lam pan, tangthu lam pan, gamdung leilupzia pan a tuamtuam kan leng a hang tampi om kha ding hi, I gensa bangin ukpite in a mau kam bek kizang ding na ci uh hileh " Teizang" pau ki pau kha ding a sangmangte in a mau siam masak mah na thupisak hileh Sihzang pau kipau kha ding hi.

Sangmangte in vai lian pi khat a angaihsut uh khat in pau nam tuam tuam a nei minamte pau nam a tawm thei pena gawmsak ding ahi hi. Tuabang hun lai-in Mangkang kumpi in hong uk a, Khamtung gam ah Zo lai tawh pilna sin ding hong vai hawm uh hi. kampau kigawm theite bang kampau tawh "Laisimbu" gelhsak ding cih thu lianpi khat hi leuleu hi. Tua ahih manin 1919 kumin Tedim vuandok zumah Tedim gam hausa lianteng kikhawm uh a, gambupah Sihzang pau zat dingin thu kisung hi. Tua ciangin Thado kampau Hiangzang khua hausa Pu Zam Khaw Thang, Zo kampau Phaitu khua hausa Pu Khan Thawng, Saizang khua hausa Pu Zaang Khaw Lian, Paite kampau Tuimui khua hausa Pu Mang Za Thang, Haiciin khua hausa Pu Tual Pum-te in Sihzangkam a teltheih loh lam uh pulak hi.

Ahi zongin Tedim, Ngennung, Haupi, Gawngmual, Leilum, Lezang, Tongsial, Lamzang,Lailui, Mawngken, Kahgen, Taklam, Tonzang, Tungtuang, Anlang, Gamlai, Khuaimual leh Seitual khua hausa te kuamah a pau a ham omlo uh hi.Hih bangin Tedim gam sungah Tedim kam pen taangkam hong suak hi. Cope topa in 1919 pan 1938 (a sih) dong khasim thukizaksakna lai a na bawl lai-in "Tedim kam thukizakna lai" na ci hi. Sang laisimbu hong bawl sak hi. A nung ciangin T=Tedim pau eima pau" ci-in khangthak naupangte i awng ziahziah hi.

4. TEDIM KAMPAU KANTELNA
Kawl leh Vai kikal-a om Zomite in kampau tuamtuam i nei hi. Kampau lam a kantel mipilte  in tangzai takin hong kansak nai lo uh hi. Ei Tedim kampau zawdiak pen Mizo pau, Hakha paute zahin hong kikansak nailo hi. Tedim kam a pau mite sung pan Laipianpa Pau Cin Hau, Rev. Hau Go, Pu Gin Za Twang, Siapi Vul Za Thang, Sia Pau Cin Thang, Rev. Paul Thuam Thang leh ZCLS a kipan kampau a kin, a siam tampite  in kanin na gelh ngei khin hi.
Minamdang kampau siamte sung pan hong kantelsak mi tamnai lo hi. Kei theihphak tan ah:

1904: George A. Grierson: " Linguist Survey of India"
1925: L.B.naylor: "A practical handbook of Chin Languages (Siyin dialect)"
1965: Eugene J.A. Henderson: Tiddim Chin: A descriptive analysis of Two texts"
1965: Ono Toro: "The Reconstruction of Proto Kuki Chin: Initial Consonants"
1979: David B. Solnit: "Proto Tibeto Burma in Tiddim and Lushai"
1989: Peri Bhaskararao: "The process of Chimming in Tiddim Chin"
1996: Peri Bhaskararao: "Computerized lexical database of Tiddim Chin and Lushai"
1998: Weera Ostapirat: Tiddim Chin tones in historical perspective" .

I Tedim pau pen a kampau ei Tedim mite leh a pua lam pan kampau siamte in kan khawm-in, laigelh-in i puahpuah i zunzun ding kisam hi. I tuntunna pan i kampau maizumpih lo-in hong dong a om leh lungsau takin genpih ding kisam hi. Sia Lian Bawi (Siapi Lian Khan Mang) in Japan pan gam a pai lai-in Ono Toro kiangah na genpih ngei a, Dr. Dal Lian in Bhaskararao kiangah na genpih ngei hi.

5. I TEDIM KAM NUNGTA I CI NGAM DIAM?
Kampau dinmun (vitality) a tuamtuam om hi. Kawlgam ah Pyu minam leh Pyu pau beimang ta hi kici hi. Leitung kampau pawlkhat beibei-a pawl khat kipan khangto semsem hi. I Tedim kam nungta hi ci-ngam taktak ding hiam? Kampau nungta ih cih te a ki puahpuah a ki zunzun hi a, a kampau neite in it mah mah uh hi. A kampau uh khum sa-ngaungau uh hi.

Tu laitak Tedim mite 70% bang bekin Tedim kampau dingin ka um bek hi. Kawlgam leh Vaigamate in pau tuamtuam peuh nuam i sa zaw a, Kawl lak a Zo khangno te bangin kawlkam kawllai leh kawl TV khawng bek tawh hun kibei hi. I thungaihsutna nangawn kawl-khuak tawh kingaih sun hi. Kampau i pau sunsun bangkua sung bek hi a, sangkil kitantan lo hi, Biakinn sung bek hi a, biakinn huangpua kantan lo hi. Hibang kampau dinmunte "Muribung" kici hi. I kampau it-in, i kep tinten kei leh beikuan manawh kampau ahi hi.

I Tedim kampau zong "meidawi"mahmah hi ci-in ka ciamteh hi. Mizo, Hakha leh Falam pau khawng ei pau sangin " suahngal" zaw hi. Kampau ameidawite a suahngalzaw kampaute in damdamin sung khumkhum dinga, a sawt lo-in valh ding hi. I kampau maizumpih kei ni.

Zolia tawh kisai-in, Laipianpa Pau Cin Hau tungtawnin Zotuallai nam nih i nei ngei hi. Tu in i zatna toi semsem a, minam vangil khat banga kep ding din mun hi ta hi. Lai hihna (malgawm) tawh Mualtung thuhilhna zong na khen ngei uh hi. Sangmangte tung pan i ngah Mangtuallai (Roman alphabet) tawh laisimbu i neih zawh kum 91 cingta hi. Lai ih gelh ciangin lai-malgawmzia leh awsang awniam thu-ah i kumkum lai hi.

Cope topa'hun a kibawl Zolai tan 4 ciang nangawn tu-in i nei nawn kei hi. Zolai tawh laibu kibawl tawm mahmah a, i neih sunsun zong Biakna lai bek ahi hi. Laibu i bawl ciangin "Pawlpi sung a zat ding" cih lai suang sawnsawn lai ihih manin i laibu a thatthat ihi hi.  I leitung huihnunzia ahih manin tua lampi bek a nei ihi hi. Zolai i cih pen Lai Siangtho sim nading, Labu ettheih nading, Pawlpite thukizaksakna lai sim nading leh laikhak nading bekin kizang lawmlawm hi. Leitungthu vangtungthu theihhuai a tuamtuamte Zomite in a theih nadingin Zolai a kizat hun hong tung takpi tam! cih ngaih sutsut huai ka sa hi.

Kampau nungta te in huihkhua in huihkhua tungtawnin Radio, TV leh tulai Cassettee, CD leh VCD te tawh theihhuai thute khahkhia ziahziah uh hi, Ut hunhunin mun khempeuh pan a kampau uh kingai thei hi. Cik hun ciang i tunna peuhpeuh pan i Tedim kam i ngaih theih hun hong tung zen tam!

6. MAILAM I TEDIM KAM
Nam citawmte ihih hangin i kampau mangthang ngei nawn lo ding hi. Ahi zongin a khanton henhan ding lamet om lo hi. Kumpi ki-ukzia kikhello-in, tulai khuahun mah tawh maban i zopzop lai leh kawlkam in gam hong kekek dinga Tedim kam in sangkil kan zo nawnlo semsem ding hi, I theihloh kalin thozo nawnlo in, i phawk khak ciangin zekai lua ding hi. Khuahun hong kihei-in Kawlgam Vaigam-a om Zomite in gam le nam a ding vaihawmkhop hun hong tun leh lah Mizo kam hong innteek mahmah dinga, khangnote in sin-in mun khenpeuhah kipau ding hi. I Tedim pau bel khanglo kiamlo, si lah nungta-in omthei ding hi.

Tua kawmkalah ei Tedim kampau innkuansung pan i kinensuah sawnsawn leh i huang hong toi semsem dinga i theihloh kal-in mite huangsung i tung ding hi. Hi thei hileh Kawlgam Vaigam-a om Zomi a kici khempeuh in Mangkam i taangkam dingin zangkhawm mai le hang, kum 30 sung bang i buaipih phial zongin manlang takin hong khantohpih thei pen dingin ka um hi. Taangkam dingin Mangkam i zatkhit ciang i nampau ciat i keptheih bangin i kem ding lam kuamah kinawknawk se lo-in khat le khat kithupisimna tawh i kalsuan leh i minam khangto thei pan ding hi. Minam a khantoh leh i kampau mangthang ngeilo ding hi.

Rev. Khoi Lam Thang pen Tedimgam, Keizang khua ah paing hi in Falam ZTC ah DipTh, India Makokchung pan BTh, Yangon MIT pan M.Div zo hi. Thailand gam Chiangmai university pan MA (Linguistic) va zo a, Singapore TTC ah MTh 2004  in zo hi. Tu in Bible Society of Myanmar ah General Secretary a seplai tak a hi hi.

Comments (8)

Mung said:

... mi khat peuh in eipau a zat ciang nuam sa in, gilvah in, cidam in, lungnuam le uh, eipau pen hong tangzai ding hi pah. Thukhat om lai.. Athupi penpen ah..Midangte pibawl ding..mipau thupi sim ding hi se ei(zuiding cihna hilo in).. Gentehna : Mizo pau pen eimi tampi adingin mavan na hi. A hih hang midang nam dang thusim vet lo uh in, Kei bang siam mahmah napi ing in lusei pau lo tawh kahin theih ciang, amau tawh kiho leng zong a theilo kineih vet se keive. Pau nuam vet lo. Mang pau: Mang pau leuleu, leitung mi khempeuh phial ading nuntak gimnam na.

May 30, 2011

KhaiKhanSuan said:

... Ei Zomi te,i kipawlkhawmna,i semkhawmna,i omkhawmnate tamsemsem le, khat le khat ipau te ki awlmawh tek leeng,i taangkam hong nosuak semsem ding hi.

September 18, 2010

Zomi_Victor said:

... Rev Thang na laiat te thupi thei mahmah ei. Kei muhna ah ih hanciam nak leh Chin pau sung pan Tedim pau pen a thupi thei pen2 ding in ngaihsun ing. Bang hang hiam cih leh : (1)Amun kizat na : Haka pau kizat theih na pen Haka leh Thantlang bek hi in Matu ah thei cih hang tawm2 bek hi. Falam pen Falam sung bek hi, tua sung ah ki el tham lai uh hi. Tedim/Zopau pen Tedim, Tonzang, Cikha, Tuithang, ah kizangh bek tamlo in Kawlpi, Khampat Chin dang te sang in thupi zaw tham hi. Tua bek lo in Lamka ah Paite tawh pen hilo-theilo a ki pumkhat ding mi khem peuh a om hi. (2)A mi phazah leh ih Pau: Ethnologue te milik(population)thu puak na ah (a nuai ah na en in) Kawlgam sung bek ah zong Tedim/Zomi pen Falam leh Haka(Thantlang kihel) kigawm zah pha ding hi(a census uh Tedim kum 1 la masa zaw in). Leitung bup hi leh amau te nih pen ei zah seh thum suah nih (two-third) bek hi. Tua ban ah eisung ah ki pum khatna a haksat leh a mau sung zong haksa zaw lai ding hi. Falam leh Haka kua zaw in zui ding, Falam sung zong a nam tuam2 om lai. Ei Zomi te ih han ciam naak leh mi gualzo in mi huam zo pen ding hi hang. Tua ciang eimi tu ciang ei pau sang Kawl pau khawng a zangh nuamzaw mu ing in tua pen amau sung ah omlo cihna hi tuan kei. Tua banah tu ciang eipau sang Haka/Falam a zangh nuam zaw ka mit tawh mu nai ke'ng. A om leh zong tawm mah2 hin teh. Ni dang in Yangon/Man'lay ah nu lehpa ginalo te ta ten Kawlpau bek eipau mawl mamaih a tam hang tuhun ciang tawm mahmah ta.Tua ciang Taangpi-pau ding pen Mangpau a hoih a bat hang thusau ngaihsun leng buaina khauh mah2 ong tun pen ding in lamen ing. A hang : Eipau a kuaman saang ngeilo ding in eipau ciat mah kipuah to kawm nuam ding. Buaina nelh siah2 tawh kibang ding. Amun Tedim(1990) Haka(1991) Falam(1991) Kawlgam 189,000 100,000 100,000 Vaigam 155,000 30,000 Nil Bangladesh Nil 1,260 Nil A Gawm 344,000 131,260 100,000 (3)Hauhna Lamah : Chin sung ah tulai mihau pen sawm ki teel leh sawm mah Tedim/Zomi in ummawh ing. A hau pen 20 teng leeng eimi lo 4 a kihel zo tam ci in ngaih sun ing. Tua ciang a mipi sung mahmah zong en leng : Chin milik bup lak ah mi nuamsa/neih leh lam cing pen 10% la khia leng, tua te lakah eimi a tawm pen 60% kiim hi'n lamen ing. (4)Lai Taan leh Pilna : Tuhun ciang Haka te sangnaupang leh laithei ong khang uh in ong kheng vatvat ding bang liang, A hi'ang tu hun lian in mipil kidem leng Falam leh Haka gawm sang ki tam zaw lai ding hi.(BA/MA la khat ong lak uh leh ken Lamka/Tedim/Vaigam pan 2-3 lak ngap ing). Tua ciang mailam ah kamphatna tawh ong kheng kha pak hi le uh kha tam sung ong kheng man kei unteh. Eimi te'n Adam khang a kipan tu ciang pilna lam ah lel ngei nailo hi hang. (5)Kumpi Lam Milian : Kawlgam in suahtakna a ngah zawh a kipan kumpi nasem lian eimi te vive hi. A maua omlo bl hikeiin ei tawh teh na in bang mah hi kei uh. Thu Khupna : Minam khat leh khat kidemna pen nam tampi pan a kidem hi. Tua nam tuam2 te et ciang ei Zomi mah gual tung kituang lai. Midang te'n ong pha dektak ta uh ei cih leh naak tai sem2 ding hi. Tua ciang midang te tawm ong khangtoh ciang zong lauh pah bap2 luat ding hi kei. Ih omna ciat ah ih nasep tek gualzawh sawm in tua in gah ih Zogam leh Zomi tung ih luang sak suak naak leh ih lawm kidempih ten cih mah hun ih ong pha dektak ngei lo ding hi. Ei Zomi teh No.1 hi den hang, zong hi suak ni. Kua man No.2 kan man lo ding hi.Zomi Nampi te Pasian in thupha ong pia ta hen.

November 28, 2009

a guest said:

... "Tua a zang khawm thei kampau innkuan dungah Sizang, Thado (Kuki), Zo, Dim, Guite, Khuano, Losau, Paite, Phaileng, Saizang, Teizang, Val leh Vangteh paute kihel hi hang, Tedim pau "Taangkam" a suah theihna thu kampau lam pan, tangthu lam pan, gamdung leilupzia pan a tuamtuam kan leng a hang tampi om kha ding hi"

November 08, 2009

a guest said:

... Hih lai at Sia Khoilam in Tedim khua- ah mi nam pau kibang lote' tengkhawm hi na cih na-ah SIHZANG mi namte teng kha lo maw? " Tedim kam cih min i ngahna,3 paragraph laigual 4 na- ah. Zolai i neihtung lai leh Sangmangte hun khin deuh lai khongin Tedim, Tedim mi i kici phial ta zongin Kawlgam, Vaigam a om mite a huam kim na dingin Zo, Zomi cih, kilawhna, kisapna-in zang-taang le'ng; kisam sa ing. Zo, Zomi cih khangthak Zomi peuh mahin Zang-taang thei le'ng, Vaigam sunga, paite cih khong zong Zomi i hi cihna ah kipum khatna lungsim lian zaqw semsem dingin ka um hi.Tua hi kei leh Lamka pau peuh, Paite pau peuh kilawhna hong lian semsem thei kha ding hi. Sim leh Mal tui banggawm ding lunggulhna tawh, Ka lungdam hi.

November 08, 2009

a guest said:

... Tuciang in Vaigam a mipi lam in en Moreh Resolution ana zuizui buang takpi leng zong Kawlgam lam ate'n hon uksak lou uh ahihna ah eimah in pai ni chi in kiphinphin pawl omta hi. Ahihang tua PLS vaipo lelte Moreh Resolution policy aman pha mahmah, apom mahmahte ahihman un lungdam huai hi. Tuahang in School, college leh university textbook te ki-at lai hi. Laibul (Primier) ah Pu Gin En Cin leh Dr Ngulzadal gelh hi a, BA 3rd year Pu Job Thawngno a zong prescribed textbook ahi hi. Hi bang a Vaigam PLS leh Kawlgam a ZCLS in semkhawm a om kisaksak lai in Manipur ah ZCLS hong kiphuan pen PLS a diing in Moreh Resolution pen nawlkhin a om hita hiam cih dotna om thei mahmah hi.

October 24, 2009

a guest said:

... Moreh Resolution ih cih pen a tom in, kei theihna ciang ah (a)"C" zatna ding mun ah "Ch" zang ding (b)"ou" zat na mun te ah "o" kizang ding cih dan hi. Gentehna in, 'Cin' pen 'Chin' a ki ngelh ding, 'lou' cih pen 'lo' a kizang ding dan hi. Ih pau ih laite a kibang a zat ding pen kisam mahmah hi buang mah ei. - Khakhai

October 24, 2009

a guest said:

... Ngaihsut tham mahmah in Kawlgam a Tedim kam pen Vaigam a Paite kam a i pom theileh lampi kihong hi. Vaigam a Paite kam a school leh college textbook kikhetna ah 1980s a ZCLS leh PLS in Moreh Resolution awlawl in na zui uh hi. Hih resolution pen Kawlgam lam ate'n pom pha manglou a i omleh hih thulu pen dik thei diing hi. Vaigam a Moreh Resolution toh kizui a University dong ah sangnaupangte'n subject a tawi ahihna uah.

October 23, 2009

Name

Comment

smaller | bigger

Write the displayed characters

Add Comment