Dr. Gin Khan Nang in tu ni Saturday, June 12, 2010, zingsang in Fuller Theological Seminary pan Ph.D ngah takpi ta hi.  Sang kah takpi aa lai a sim ngiatngiat Zomi sung ah kum 65 a cin ciang aa doctorate degree a ngah masa peen a hiding iin ka um hi.  Sia Nang peen doctorate la ding iin September 2005 iin Fuller Theological Seminary, Pasadena, California, ah Shillong khua, Meghalaya, India pan hong pai hi.

USA ah sang kah ding iin a hong tun tung iin a sang in a omna ding mun pia pah zo lo ahihmanin Dr. Khai (Chin Khua Khai) leh Dr. Lilly (Lian Khan Cing) te in inn sap, nek leh dawn man te ngen het lo iin kha khat vaal bang a na don ban uh ah thu khempeuh na vaanpih uh ahihmanin Dr. Khai te innkuan tung ah a lungdamna gen bel iin nei hi.

Fuller Theological Seminary peen leitung bup aa evangelical school te lak ah a min thang peen khat ahi hi.  Tu aa commencement ah masters leh doctoral degrees a ngah khempeuh 780 pha aa faculty of studies nam 5 sung pan doctoral degree a ngah 179 pha hi.  Dr. Nang’ gualzawhna a lungdampih, greater Los Angeles area aa a kibusa Zomi a om thei teng in graduation commencement kibawlna Lake Avenue Church, 393 N. Lake Ave. Pasadena, CA 91101 ah ka na lungdampih uh hi. Photo khawng nuam tak iin ka kilak ngeingai khit uh ciang iin Sia Nang in ama gualzawhna pawi an ne ding iin amah a uap khempeuh Chinese Restaurant, Pasadena Panda Inn, 3488 E. Foothill Blvd. Pasadena, CA 91107 ah hong pai pih aa gilvah tak iin sun an ka ne khawm zihziah uh hi.  Kawlgam pan aa hong zin pak Rev. Cin Khan Thang Ngaihte te nupa leh Philippine aa Asia Theological Seminary pan aa hong pai Dr. Gin Neih Thang Ngaihte te nupa (Lamka, India) te zongh hong kihel thei uh hi. Attached photos nih om hi.

Dr. Gin Khan Nang’ Tangthu Tomno

Dr. Nang peen 1945 kum pawl Murlen khua, Mizo gam ah Pu Khup Khaw Nang Khupson leh Pi Dim Niang Suante te sung pan aa piiang unaau 8 sung pan a 6na ahi hi. A pianpih laizom teng suut pak lengg:

1) Go Khaw Nang (Kaplei Veng, Tahan, Burma)

2) Ngem Ngaih Cing (Phualpi Veng, Kalemyo, Burma)

3) Nian Za Cing (2006 paisa) (Ngur, Mizoram, India)

4) Hau Khaw Luan (1969 paisa) (Pangzawl, Lamka, India)

5) Gin Za Go (Aizawl, Mizoram, India)

6) G.K. Nang (Shillong, Meghalaya, India)

7) Nang Lam Thang (Champhai, Mizoram, India)

8) Za Lun Kap (Bangkok, Thailand)

Dr. Nang in a zi Ning Khan Cin (1994 paisa, New Lamka) tawh a neih a tanu/tapa thum te a nuai aa bang ahi hi.

1) Niang Sian Lun, Aizawl (ta 2nei)

2) Nang Suan Khai, Kuala Lumpur (ta 2nei)

3) Cing Biak Sang, B.A. (Kuala Lumpur)

Kamsiatna tawh a zi in ong nusiat ciang iin 1995 kum iin Nu Ching Za Man tawh kiteeng uh aa a nuai aa te geel a tanu nih te ahi hi.

4) Cing Ngaih Vung (kum 14)

5) Huai Ngaih Mang (kum 12)

Hi bang iin pilna saangpi leh lukhu neelkaai a khuk theih nading iin pilna a sinna phual tuamtuam te a nuai aa bang ahi hi.

• Primary School Education, Murlen L.P. School (1958)
• Middle School Education, Aiduzawl ME School (1961)
• High School Education- Sielmat Christian High School, Lamka (1969)
• Bachelor of Theology – Eastern Theological College Jorhat, Assam (1975)
• Bachelor of Divinity - United Theological College, Bangalore (1983)
• Master of Theology - International Baptist Theological Seminary, Switzerland (1990)
• Th.M. thesis- “Evidences of Growth Among Zomi Baptist Churches in Indo-Burma.”
• Doctor of Philosophy - Fuller Theological Seminary (2010)
• Ph.D. dissertation – “Zomi Christianity and Cultural Transformation.”

Dr. Nang peen sang kah paisuak lo iin nasep masuan tawh helh zel iin sang kah zel hi. Tu aa Doctoral program a lut masiah a nasep masuan te a nuai aa bang ahi hi.

Youth Director, Finance Secretary, Executive Secretary (1975-1994), Chin Baptist Association, Lamka, Manipur State, India

Church Pastor, Executive Secretary (1995-2005), Zomi Baptitst Church, Mizoram. India

Nasep kawm leh sang kah kawm iin ih Zomi te ading deihsakna tawh lai bu nih gelh aa laibu 7 kam leth hi.  USA ah doctoral program a kah sung iin Zomi te ii kithuzakna email groups te sung ah lai leh thu hoih nono hong gelh zelzel ahihmanin Zomi International Network makai te in “Award of Writer of the Year 2009” cih min phatna pia iin February 20, 2010 ni iin Chin National Day pawi ah Zomi International Network aiawh iin Dr. Chin Khua Khai iin award piakna nei hi.

Comments (2)

Sia Khampeek (Tongsan Pu) said:

... Zogam nuam members leh Dr. G K Nang, Zomi sungah Doctorate ngah a hunhun in i kibehlap zelna sung pan Rev. G. K.Nang in hong ngah theih manin lungdampihna i nei hi. Minam leh Pasian ading hong kipasal sak semsem dingin i thungetna hisak ciat ni. A lungdam pih, Tongsan Pu

June 24, 2010

Zo Khup said:

... Congratulation Dr.Nang

June 19, 2010

Name

Comment

smaller | bigger

Write the displayed characters

Add Comment