 Mi om masa loin pau om masa ngei lo a, pau om loin lai kinei thei ngei lo hi. Minam a om ciangin pau hong om a, tua paute gelh nading lai hong om thei pan hi. Lai nei lo minam pen cikmah hunin minam kician suak ngei lo ding hi. Mihing in pau leh ham kinei a, hih pau le hamte gelh khiat nadingin lai kician leh gina i neih matengin minam kician kisuak thei ngei lo hi. Damdamin hong mang hiaihiai-in, khang bangzah hiam khit ciangin minam dangte kikalah hong kizepmang ding hi.
Minam tawm khat in pau leh ham kician nei napi in lai nangawn tawh hoih taka a kineih theih hangin, i pau leh i lai in gam
zeel zo tuan lo ding ahih manin, minam kician leh picing i suah baih zawk theih nadingin, ei aa bek ci tentan loin, a kizangtang thei kim pen zang khawmin ei aa suaksak leng, ei adingin bangmah supna a om lo bek tham loin, minam kician leh picing kisuak baihzaw ding hi.
Ei aa bek i guitunsak nop a, i mi tamna in a cinzawh tuan kei leh, mi nungdelhin kinitum den ding a, khantohna ahihna sangin i khanmawh tang leh bilbawk ding hizaw hi. Hih thu tawh kizui in i ngaihsutna leh lungsimte i tangzaisak mahmah kei leh, upate’n “akta duhgawl kilawhkhuh” a cih uh kisuak thei mawh lo ding hi.
Tua ahih ciangin a thu in a maan keei hangin, sepna tawh piang thei taktak lo dingpi peuh i hanciam keei hangin, koimah ciang kitung zo het lo kha thei ding hi. A gam leh a lei pianzia leh, a thu leh a la omzia i muhkhiat theih ding thupi pen hi. A piang zo ngei lo dingpi peuh, ei deihkaih thu a i phuttawm keei hangin, kitaksuak zo ngei lo ding hi. Pasian in a na geelsa ei adinga a hoih pen khat om ding hi. Tua in bang a hiam, cih i muhkhiat theih ding kisam hi.
Tua ahih manin Ama gam leh a dikna zongkhia thei leng, a ban a kisam lai teng Pasian in hong pia nuam mahmah ahih lam phawk ni.
Pasian in thupha hongpia a, leitung pilna tuamtuamte sinin sang ah i kah hi. Nidanga i theih ngeiloh leh i zak ngeiloh Kawlpau leh Mangpau khawng eima pau sangin zong mi tampi in nuam kisazaw hi.
Tua ahih kei leh, Kawlgam thuk lam khawngah va kiom-in Kawlpau bang kipawt ziahziah hi. Hih zong i hamphatna Pasian hong piak thupha hi a, lungdamhuai mahmah hi. Ahih hangin mi tampite in amau pau le ham thei nawn lo uh hi. Zomi hi napi, Zopau i theih kei leh minam kician leh picing kisuak ngei lo ding hi. Kawlgam mi i hih ciangin Kawlpau pen i siam hamtang kul hi.
Ahih hangin Zomi i hih manin Zopau i mansuah ding hi tuan lo hi. Kawlte lakah om lehang, hi pa Zomi hi hong ci ding uh a, Zomipa kiKawl misak, hong ci leuleu le uh, minam a kician het lo khat kisuak ding hi. Kawlte laka i om ciangin Kawlte banga om theih ding a, Zomite laka i om ciangin Zomite banga i om theih pen minam kician khat i suahna hi.
Kawlmi a laklawh, Zomi a laklawh a i om leh, minam kician lo, cikmah hun a picing ngei lo ding mi vanglak kihi ding hi. Eima ut thu tawh Zomi kimlai Kawlmi a kipia cih om thei mawkmawk lo hi. Pasian thugen khat in mi lungsim a lak theih nadingin, “Kei pen Pawite ka hi hi, ahih hangin Lusei ah ka kipia hi,” ci hi. Ei ut thu a hih banga kipiak mawkmawk cih om thei lo hi; i pianna minam si le sa in thu gen hi.
Ama pianpih pau le ham, leh ngeinate a mansuah kei nak leh, Judah mite lakah Judah mi banga a om a, Gentelte lakah Gentelte banga om theih ding pen, Lai Siangtho tawh a kituak mahmah ahi hi. Khris adingin mi khat a ngah theih nadingin, Judah mite lakah Judah mi banga i nuntak a, Gentel mite lakah Gentel mi bangin i nuntak theih ding a thupi pen hi. Ahih hangin i ci leh i nam ei deih banga kiphiat thei hi lo hi.
Japan Galpi a hong tun ding cianga lam kuli a kuan a ciamnuih hat khat in, “Mangkangte khata ka na pian loh kisiik peuhmah ing,” ci hi. Ama ut bang hi leh Mangkangte a kipia nuam hi gige hi. I kibawl tawm nop hangin, ei kibawl zawh thu hi lo hi. Ei le ei kibawltawm pen mival leh mivanglak kisuahsakna ahi hi. Mi gina lo, mi kician lo leh minam picing ngei lo dinga ei le ei i kibawlna ahi hi.
Koikoi ah om ta lecin, Zomi na hih lam kizahpih kei in la, minamdangte in Zopau in a pau ciangin zong siamta kei leh, zahpihin simmawhbawl ke?n la, pahtawi zaw in. Hih in nampi, mi picing na hi zaw hi. Amau pau pen i siam het loh hangin, minampi leh picingsate, Mangkangte bangin nuihsan peuhmah se lo uh hi.
Gentehna in Tedim a Sangmang hong sem Rev. J.H Cope in, “Kham Za Go koi ah om hiam?” cia a kan leh, “Kham Za Go is a barking deer in the jungle pungpung,” cia a dotna pa in a dawn ciangin, nuihsana, simmawh bawlmawk loin, limtakin, bang gen nuam ahi hiam? ciin a ngai hi.
Ahih hangin Khalkha khua a Sangmang hong sem Dr. C.U Strait in Tedim ah hong zina, a anhuanpa kiangah Tedim pau tawmtawm a sin khit ciangin, Tedim pau in thu hilh nuam ing, ciin Nipi zingsanga thu a hilhna ah, “Note Tapidaw na hih hangin mangdawi a om kei hi,” a cih leh a neu a lian a kikhawm khempeuha vekpi un, khitui luang liangin a nui uh hi, kici hi.
Amah zong maizum pianin nuamsa loin,a cih nading dang a theih loh ciangin a anhuanpa kiangah, “Ram Hlun, nang na hni deuh,” ciin a maingap penpa kawk hih tauk hi.
Eite in hih banga i pau a hong sinte ciammuih bawl a, zahko in i nuihsan ding hi loin, pahtawia i hanthot ding hi zaw hi. Ei sung mahmah ah zong Saizang, Tonzang, Khuano, Vangteh, Dim, Losau, Sukte, Guite, cih bangin khua sim phialin i awkaih tuamtuam om a, khat le khat i kisimmawhna leh, kimaizumsak nopna-in kiciingin, kikobawl thei lailai i hih ciangin, nakpi takin kingaihsun a kipuahphat mahmah ding kisam hi.
Hih bang kampau kisimmawhna leh kigawibawlna in hong gawmkhawm loin, hong khen zaw ahih manin, bangmah a sim taak hi kei, thupi kei, ci a i zat veve leh, minam kician leh minam picing i suah nading hong khak mahmah ahih lam i phawk ding kisam hi. Bang hang hiam cih leh, hih in kiphatsakna hi a, midangte simmawhna ahih manin, a gina lo pente nangawn i itbawl a, amaute i pawlbawl kei leh, simmawhna, zahkona leh ciammuihna bawl a nuihsanna tawh pawl kingah ngei lo ding hi.
Mi nampi leh minam kician, a picing i suah nadingin a neu pen, a niam pen leh a gina lo pen a i kikoih theih ding kisam hi.
I kampau leh gamtat luheknate khempeuh ah innteek lungsim pua in mi tamzawte hoihna leh phat nading ahih nak leh, eima dikzawkna nangawn ah a mawhzaw leh a khialzaw tuhin, ki-itna leh kilemna a pian nading zongin thu i khual mahmah ding ahi hi.
Eima pumpi i ki-it bangin i ci le namte it a, minam bup ading siatna sangin eima pumpi i sup ngam zawk ding kul hi. Kei adingin a hoih hi peuh leh, midangte in bangzah takin siatna leh supna a thuak hangin phamawh kei, ci a ngaihsutna lungsim peuhmah i neih ding hi lo hi. Mi tampi in eima angsung ding bek zonna in i minam buppi kizuakkha thei hi. An kam khat tawh na minam zuakkha kei in. Niangtui hai khat tawh na minam zuak kei in. Nang ading maipha na zonna in thu kam nih khat tawh na minam zuak kei in. Nang
adingin nungta masa kei in la, na cipih leh nampihte adingin nungta masazaw in.
Tu hun ciangin annek tuidawn haksa mahmah ahih manin, mi tampi in ama sep ding leh a biak a paai tawh kituak lopipi in annek tuidawn kizong hi. Na khut in a hong mawhsak leh tan in la pai in; khut nih nei a Hell sung na tun sangin khuttawng a vangam na lut ding hoihzaw hi. Na mit in a hong khialhsak leh, khelkhia in la pai in; mit nih nei a Hell sung na tun sangin mit langkhat tawhvangam na tun ding hoihzaw hi.
Na thadah manin zu leh za peuh zuakin neek zong kei in. Na biak Pasian in nang hong mu gige hi. Na thadah manin na pumpi peuh zuakin neek zong kei in. Na cipih nampihte zuak bek tham loin, na Pasian a zuakzuak na hi hi. Na nuntakna thawl sungah koih kei in. Thawl sunga kibilhcip dingin Pasian in nang hong bawl lo hi. Mihing pen ei guak a tang om a, i ut bang peuh a kinungta thei hi lo hi. Mihonpi tawh kithuahin i kipawl kul hi. Na inn veng na inn pam tawh na kipawl kul hi. Na khua na tui leh na Pawlpi tawh na kipawl kul hi. Hih ciang bek tawh kicing nai lo lai-in, a hong uk kumpite deihna, a gam a lei a munmun a vaihawm upate deihna tawh kituakin i nuntak kei leh gammi hoih kisuak thei lo hi.
Eite in tuni ading bek leh ei ading bekin nungta loin, midangte a ding leh mailam kum tampi adingin a nungtate i hih ciat ding kisam hi. Tuni a i sep i bawlnate in mailam cianga khangthakte adingin a bul na patsakin, amau hong khantohzia uh a lampi na khunsak ding ahi hi. Tuni a bul i patsakna tawh lam maan i lah theih leh, mailam hun i nuntakna kip in i khanzia zong maan in hat
ding hi. Tuni a Zomite hih ciang i tun theihna pen i pu i pate tuma kum sawm thum, sawmli laia a hong patsakna tunga kinga ahi hi.
Hih thute phawk in i gam makaite in kum 1983 sungin na lianpi hong vaihawm uh a, a tangtungsak ding leh a kipsak ding pen Pasian ahi hi. I minam itna leh deihsakna in ei mite sung pana mimal hanciamna tawh hong kipia sum le paite zong kum 1983 sunga pen kum danga sangin tam pen hi. Sang naupangte leh mimal tuamtuamte ngaihsutna zong i mangngilh het loh ding thu tampi tak om hi.
Biakna lama i nasepnate zong CCOCte a kipan a dangdangte i et ciangin, lam tuamtuam ah 1983 pen kum hoih kum pha hi, ciin a cipteh ding thu tampi om hi. I sep i bawlnate khempeuh a vekpi in mimal ading khat beek om lo a, i ci i nam, i pau i lai a kipan i gam i lei, Pasian thu le la tawh puah a khantohna i neih theih nadingin zunna ahih manin, a neu a lian in a milipin, minam kician
leh picing i suah nadingin, lungsim taktak tawh cihtakna nei in, tha le zung a kisapna munah tha le zung zang a, pilna siamna a kisapna munah pilna siamna zang a, sum leh pai a kisapna munah sum le pai zang a, thu le la kisapna munah thu leh la tawh Pa Pasian leh ama gam adingin minam kician leh picing i suah nadingin i hih theih tawp ciat suah in hanciam ciat ni. Jesu Khris pen
Zomi namte kumpi leh Topa in a hong maan a, i gam i lei in Topa Jesu teena Galilee gam thak suaksak sawm ciat ni.
“Topa’ Nasepna ah" page 86
 |
