|
Mihingte i nuntakna sungah nasep silbawlna, gentheih haksatna le gualnopna, dahna thu tuamtaumte tawh nisim kibuai den hi. Ni khat nai 24 pen kicingsak lah liangin i buai hun teh " Bunghawm khat le niangtui hai nih" thu i phawk den dingin kong hawm sawn nuam hi.
Ni khat, sang naupangte philosophy ahilh professor pa a class sungah van pawl khat tawh kigingsa in na om hi. Sangnaupangte a kim ciangin, Siapa in pau mello in ah, Bunghawm khat hong lakhia aa, tua sungah goft tang hon khat thunsuk hi. Goft tangte bunghawm a dim ciang, Siapa'n a dim nai hia ci in naupangte dong hi. Dim mah ei, ci-in dawng ngeingai pah uh hi.
Siapa in, suangsi hai khat tua goft tang lakah sun beh in, a sinlitlit pian leh suangsite lut sukin bung hong dim leuleu hi. A ngei mah bang sang naupangte kiangah a dim hia? a cih leh dim mah Sia aw, ci in thukim ciat uh hi.
Siapa'n aban zomin, sehnel haikhat suangsi kawmlak ah sungsuk leuleu hi. Petpet ah, sehnel teng in bungsung mun awng khempeuh hong dimto sak hi. Siapa'n dong leuleu, sang naupangte aw, a dim tatak hiam a cih leh, kithuak takin dim mah hi Sia aw, ci in dawng khawm uh hi. Siapa khawl nai tuan loin, niangtui hai nih bawl tadih in, bung sung ah hong sun beh leuleu mawk hi. Sang naupangte nui ngeingai uh hi.
Khaileh, a nui zuahzuah teng hong dah teh siapa in, a kuamaciat in hi bunghawm pen na nuntakna bang un na tel theih dinguh ka deih hi ci-in gen hi. Goft tangte pen na nuntakna ah a thupi diak ahi, na Pasian, na innkuanpih Nu le Pa, zi le tate, na cidamna le na uk diak khat in ngaihsun un ci, a dangna khempeuh om lo in, hi a thupi diakteng nei peuh lecin na nuntakna a dim hi lel hi ci. Suangsite pen ahih leh, a dang i nasep tuamtuam, inn le lo, mawtaw cih bangte in bulh ding hi aa, sehnelte leuleu ahih leh a dang nengneng a thupi lualote ahi hi. Hih sehnel pen bung sungah kithun masa hileh goft tang le suangsite kita nawnlo ding hi.
Siapa in a zomin, I nuntakna te tua bangmah hi a, i hun le thatangte a thupi masalo nengnengte tawh i beisak leh, a thupi zawtham na dangte a ding mun awng om nawn lo dinghi. "Na nuntakna nopsakna ding nate thupi sak masa in" "Na zi na tate tawh hun nuam zatsiam in" "Na cidamna ding kin bawl masa in" A om lo theilo thupi nate ahi goft tang bangte kin masa in" "A kisam diakte lenkip masa in, a dang neuneute pen sehnel hi sak in" a cih laitak, sang naupang numei khat in a khut lapin, Sia aw, niangtui hai nih e leh, bang a deihna aa? ci in adot leh, Siapa nui kawmsa in, lungdam ei!, hi nong dot theih ci kawmin,
"Hih niangtui hai nih pen, na nuntakna bangzah takin a dim hang na lawm it khat tawh na dawn khop ding, na kikhawlh khop hun ding om teitei hi," cih teng Professor pa in hilh ci veh aw guai!
Tu ni, Zomite ee leh? It ing ci i gengen, I gam le mipihte a ding thute koi munsanah i koi aa? Goft tang maw? suangsi maw? sehnel maw? tuateng a hih kei phial leh zong buai mahmah kawmkalah i mipih, sapihte tawh holim khop hun ding om sak teitei ding thupi kasa hi. I uk a kibat loh hang, i class a kibat loh hang, pawlpi tuam ciat ah i om hang, nasep kibat loh hang,... manlah luat paulap pongin, kiho ngeilo, kithuza ngeilo liang in Zomite om kei ni ee guai! Koikoi ah i om zongin mikhat sakhat aki-it Zomite i hih zawhna ding hanciam ciat ni.
Manlah khawmkalpi mah a i kihopihna manpha se hi. Kihona pan, kimel theihna khang aa, kimeltheihna pan ki-itna piang hi. Ki-itna omna ah kilemna kipan hi. Kilemna om peuh le kimapang khawm thei hi. Khaileh guai i step masa pen ding i buai ciat kawmkalah kithuza in, kiholim zel ni.
Zomi sungah,
Tg. Khat Thang
Jan 14, 2010, 12:30am
 |
