(65th Zomi/Chin National Day muakna) Paak tuiduh lo khat a khan ding deihsak lua in, tui ih buakbuak khak leh hong si zawsop kha ding hi. "A hunzui in a kikhel theilo na khat, a nuntaak paisuak ding hamsa hi" ci-in a beisa kum tampi laipek in leitung mipil minthang khat in, a na gen hi.Mipawl khat ten, na khat peuhpeuh a pianciang , a sia leh a pha tonkhawm, na ci se uh hi. A hih leh, kua-mah mawhsakna hilo, ih taangthu ih batzawh tan, tawm sulzuih kik ni ci leng,

Minam kician leh picing a kingaihsunte pen, pupa ngeina leh tawndan kician nei te ahi hi. Tua ahih manin pupa ngeina leh tawndan a nei khawm milip pen minam khat in kingaihsun hi. Tua ngeina leh tawndan tuamtuam i neihkhopte zuun khaw puahkhawm lo-in bang zahtakin kigawmkhawm ding i sawm zongin, amawkna pi suak ding hi.

Tukum Malaysia, Kuala Lumpur khuapi laizang aa kibawl Zomi Nam Ni limlaak (photo) a mu kha peuhpeuh in, lungdam huai ei aci ih om hiam? Ahih kei leh, hizah tak lawmlawm khua ngaih huai si hang, aci simsim ih om hiam? Aki banglo muhzia tuamtuam hong pia ding hi; Kum 64 Cin'na Zomi Nam Ni bawlin pawipi a pai kampau kibang sinsen Zomi 3,000 ki pha dek phial ding aa, Stadium Chinwoo acih indoor stadium pi khat a kikawm pen, naupang tutna ding zong awng nawnlo zahin ki dim phitphet hi. Tutna mun awng nawnlo lampi awng teng ah a kidin' ngeingai tak ciangin, pawi kemding aa ih kawm rela te bang khua ul nul liang mahin lampi ding sial keii uh hi. Numei naupang pawlkhat a ciahkik mai ki-om hi. Tua zong pen, tul bangzah pawi hong kihel theilo cihkhat omlai hi!